Украина президенти Владимир Зеленский ва Буюк Британия бош вазири Риши Сунак 12 январь куни Киевда икки давлат ўртасидаги хавфсизлик битимини имзолади, деб хабар бермоқда УНИАН агентлиги.
Ўтган йили НАТО саммитида «Катта еттилик» (G7) давлатлари Украина хавфсизлигини узоқ муддатда таъминлашга ваъда берган ва декларация имзолаган. Буюк Британия Украина билан бундай шартнома тузган биринчи давлат бўлди.
Буюк Британия бош вазири идорасининг маълум қилишича, келишув Лондоннинг Киевга кўрсатган ва кўрсатадиган ёрдамини расман расмийлаштиради. У ахборот алмашиш, ҳарбий ва тиббиёт ходимларини тайёрлаш, киберхавфсизлик ва мудофаа саноати соҳаларида ҳамкорликни ўз ичига олади.
«Шунингдек, Буюк Британия Украинага Россия томонидан яна ҳужумга учраса, у билан маслаҳатлашиш ва уларни ҳимоя қилиш учун „тезкор ва барқарор“ ёрдам кўрсатиш мажбуриятини олади», — дейилади ҳукумат сайтида.
«Бугун… Украина ва Буюк Британия янги ва мисли кўрилмаган хавфсизлик битимини имзолаган кун. Бу шунчаки декларация эмас. Бу бизнинг ҳамкорлигимиз, хусусан, Буюк Британиянинг буюк глобал қудрати томонидан берилган хавфсизлик кафолатлари туфайли юзага келадиган ҳақиқатдир», — деди Зеленский.
Украина президентининг сўзларига кўра, Британиянинг ушбу ҳужжат бўйича мажбуриятлари Украина НАТОга аъзо бўлгунига қадар ўз кучида қолади.
Британия ҳукумати раҳбари, шунингдек, 2024−2025 йилларда Украина учун 2,5 миллиард фунт стерлинг миқдорида ҳарбий ёрдам пакетини эълон қилди. Бунинг камида 200 миллион фунт стерлинги минглаб ҳарбий дронлар, жумладан, разведка, ҳужум ва денгиз дронларини сотиб олиш ва ишлаб чиқаришга сарфланади.
