Бухоро вилояти Шофиркон туманида аёл кичик ёшдаги боласини бешикка боғлаганча қийнаб, калтаклаб келгани аниқланди, дея хабар бермоқда Болалар омбудсмани матбуот хизмати.
Бу бўйича омбудсманга мурожаат ва видео келиб тушган. Унда С.Н. (аёл) кичик ёшдаги фарзандини 2 йилдан бери калтаклаб, қийнаб келаётгани баён этилган.
Туман ички ишлар органлари олиб борган терговга қадар текширувда аниқланишича, С.Н. 5 ёшли фарзандини бешикка боғлаган ҳолда таёқ ва бошқа жисмлар билан муттасил равишда узоқ вақт давомида (2022 йил мартидан 2023 йил ноябригача) калтаклаб, қийнаб келган.
Ҳолат юзасидан аёлга нисбатан Жиноят кодексининг 110-моддаси 2-қисми, «а,в» бандлари (Вояга етмаган, ожиз аҳволдалиги аён бўлган шахсни қийнаш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Аввалроқ Россияда бўлган эрига жаҳл қилиб, боласини қийнаганини тасвирга олган ва турмуш ўртоғига юборган каттақўрғонлик аёл жазога тортилганди. 23 ёшли она судда бу ишни эрини қўрқитиш мақсадида қилганини айтган. Суд ҳукмига кўра, судланувчи аёл 7,5 млн сўм жарима тўлайдиган бўлган.
