2023 йилнинг март ойида ижтимоий тармоқларда аёл ўз болаларини қийнаётгани акс этган видео тарқалиб, фойдаланувчилар эътирозига сабаб бўлган эди.
Самарқанд вилояти ИИБ ахборот хизмати мазкур ҳолат бўйича муносабат билдириб, ҳолат Самарқанд вилоятининг Каттақўрғон туманидаги Андоқсой қишлоғида содир бўлганини таъкидлаганди.
Вилоят ИИБга кўра, 2000 йилда туғилган Х.У. Россия Федерациясида бўлган эри ўртасида юзага келган келишмовчилик оқибатида жахл устида, боласини қийнаб, тасвирга олиб турмуш ўртоғига юборган.
Жиноят ишлари бўйича Каттақўрғон тумани судида мазкур ҳолат кўриб чиқилди. Суд мажлисида судланувчи Х.У. бу ишни фарзандларига азоб бериш учун эмас, балки эридан ўч олиш мақсадида қилганини таъкидлади.
«Мен айбимга иқрорман, қилган ишимдан пушаймонман. Бу ишни болаларимга азоб бериш ниятида эмас, эримни қўрқитиш мақсадида қилганман. Шу видеони кўрса, ундай гапларни гапирмайди, тўғри йўлга ўтади, деган мақсадда видеога олганман. Эрим Россиядан келса, оиламни тикламоқчиман. Суддан менга егиллик беришини сўрайман», — деди аёл.
Болаларнинг қонуний вакили бўлган бувиси эса набираларини ўзининг тарбиясига олиб беришларини сўради.
Суд ҳукмига кўра, судланувчи аёл Жиноят кодексининг 112-моддаси 1-қисми (ўлдириш ёки зўрлик ишлатиш билан қўрқитиш) да назарда тутилган жиноятни содир этганликда айбли деб топилди. Унга ушбу модда билан БҲМнинг (300 минг сўм) 25 баравари миқдорида, яъни 7 500 000 сўм жарима жазоси ундирилиши белгиланди.
