Туркияда ўтган йилнинг февраль ойида содир бўлган кучли зилзила оқибатида биноларнинг қулаши билан боғлиқ биринчи йирик жиноий суд жараёни бошланди, деб хабар бермоқда BBC.
Судда Туркия жануби-шарқида жойлашган Адияман шаҳридаги Isias Grand меҳмонхонаси қурилиши жараёнида меъёрий қоидаларни бузганликда айбланаётган 11 кишининг иши кўриб чиқилади. Улар орасида меҳмонхона эгаси ҳам бор.
Зилзила вақтида меҳмонхонада Адияманга турнирда иштирок этиш учун келган мактаб волейбол жамоаси ва машғулотлар учун келган туристик гидлар гуруҳи бўлган. Бино қулаши оқибатида 72 киши ҳалок бўлганди, улардан 35 нафари — волейбол жамоаси аъзолари, жумладан, 24 нафар бола, уларнинг ота-оналари ва мураббийлари эди, дея аниқлик киритди The Guardian.
Isias Grand Адиямандаги энг машҳур меҳмонхоналардан бири сифатида 2001 йилдан бери фаолият юритиб келаётган эди. У «бир неча сония ичида» қулаб тушди, деб таъкидлайди BBC. Экспертиза шуни кўрсатдики, бино устунлари қурилишида шағал ва қумга бошқа қурилиш материаллари аралаштирилган.
Айблов хулосасига кўра, 2016 йилда бинога зарур рухсатномаларсиз қўшимча қаватлар қурилган.
«Улар меҳмонхона эмас, оммавий қабр қурган, — деган BBC`га ҳалок бўлган ўқувчи қизлардан бирининг онаси. — Маданият ва туризм вазирлиги томонидан меҳмонхонада кўплаб текширувлардан ўтказилиб, тўртта юлдуз билан тақдирланган. Кейин эса у қулаб тушди ва 72 киши ҳалок бўлди. Бу ишда айбдор бўлганлар жазоланиши керак».
Бошқа қурбонларнинг яқинлари ҳам суддан айбланувчига нисбатан қаттиқ жазо тайинлашни талаб қилмоқда. Агар айбдор деб топилса, улар 2 йилу 8 ойдан 22 йилгача қамоқ жазосига ҳукм қилинади.
- 6 февраль куни Туркияда 7,7 магнитудали, сўнгги 100 йил ичидаги энг кучли зилзилалардан бири содир бўлганди. 44 мингдан ортиқ одам қурбон бўлган, юз минглаб бинолар қулаган.
- Туркия ҳукумати қулаган биноларни қуришда у ёки бу тарзда иштирок этган 612 кишига нисбатан жиноий иш очди. 200 га яқин одам, жумладан, қурилиш пудратчилари, назоратчилар ва бошқалар ҳибсга олинган.
- BBC`нинг таъкидлашича, вайроналар кўлами туфайли Туркия ҳукумати жамоатчиликнинг кескин танқидларига учраган. Фуқаролар ҳукумат меъёрларга риоя қилмаган ҳолда олиб борилган ушбу қурилиш бумини рағбатлантирганига ишонади.
