28 декабрь куни Uzbekistan Airways миллий авиакомпанияси йил бошидан буён 5 миллионинчи йўловчини ташди. Бу ташувчининг бутун фаолияти давомидаги рекорд йиллик кўрсаткичдир.
Беш миллионинчи йўловчи Москва-Тошкент йўналиши бўйича HY604 рейсида рўйхатга олинди, деб хабар қилди компания матбуот хизмати. Парвоз давомида самолёт бортида авиакомпания номидан юбилей йўловчи Дилшода Турғуновани қутлаган самолёт сардорининг табрик сўзи эшитилди.
Ўзбекистон пойтахти аэропортига етиб келганида уни Uzbekistan Airways миллий авиакомпанияси вакиллари, жумладан, компания раҳбарияти тантанали равишда кутиб олди. Унга эсдалик совғалари ва Uzbekistan Airways`нинг 75 та мунтазам йўналишларидан исталган вақтда бизнес-классда парвоз қилиш учун сертификат топширилди.
Дастлабки ҳисоб-китобларга кўра, 2023 йилда авиакомпания 32 мингдан ортиқ рейсларни амалга оширган (2022 йилда — 28 127 та, ўсиш 16 фоиз). Ўтган йили 4,2 миллион йўловчи ташилган. Бундан ташқари, жорий йилда 50 минг тоннадан ортиқ юк, жумладан, 30 минг тоннадан зиёди йўловчи самолётларида (ўсиш 7 фоиз) ташилди.
10 та янги мунтазам йўналишлар қатнай бошлади. Компаниянинг самолёт парки бешта Airbus А320neo ва иккита L-410, шунингдек, учта ATR-72 (Silk Avia`нинг Uzbekistan Airways таркибига ўтиши) билан тўлдирилди.
