АҚШ Ўзбекистонда туғилган икки россиялик шахсга нисбатан санкцияларни жорий этди. Бу ҳақда АҚШ Молия вазирлигининг хорижий активларни назорат қилиш бошқармаси (OFAC) хабарида айтилган.
«Қора» рўйхатга Бухоро вилоятида туғилган россиялик миллиардер Искандар Махмудов ва унинг ўғли Жаҳонгир Махмудов киритилган. OFAC маълумотларига кўра, АҚШда рўйхатдан ўтган «Ураль кон-металлургия компанияси» (УКМК) ташкил қилган ва унга эгалик қилувчи тадбиркор Россиянинг бошқа металлургия ва тоғ-кон компанияларига ҳам эгалик қилади ёки директорлар кенгашида ишлайди, шунингдек, Россиянинг бир нечта молиявий хизмат кўрсатувчи компанияларига эгалик қилади. Бундан ташқари, Махмудовнинг «Россия уюшган жиноятчилиги билан алоқаси бор», дейилади хабарда. Илгари у Янги Зеландия ва Буюк Британиянинг санкциялари рўйхатига киритилганди.
Жаҳонгир Махмудов УКМК вакили бўлиб, илгари Россиядаги рух заводида ишлаган. Шунингдек, у ҳам Янги Зеландия ва Буюк Британия томонидан санкцияларга дучор бўлган.
«Лента.ru» маълумотларига кўра, Махмудов Тошкент давлат университетининг шарқшунослик факультети араб тили йўналишини тамомлаган. 1984−1986 йилларда Ливияда совет ҳарбий маслаҳатчилари ва мутахассислари гуруҳининг таржимони, 1986−1988 йилларда Ироқ бош штаби ҳарбий объектлари қурилиши бошқармасида ишлаган. Биринчи тижорий тажрибасини Ўзбекистон учун миллий квоталар бўйича товарлар харид қилиш билан шуғулланувчи «Ўзбекинторг» давлат ташқи савдо ташкилотида ишлаган.
Кейинчалик Махмудов Россияга кўчиб ўтиб, Гай кон-бойитиш комбинатига бошчилик қилган. 2002 йилдан бошлаб «Ураль кон-металлургия компанияси»ни бошқарган, ҳозирда у Россиядаги мис, рух, кўмир ва қимматбаҳо металларнинг энг йирик ишлаб чиқарувчилардан бири ҳисобланади.
2022 йил март ойида Искандар Махмудов ва унинг шериги Андрей Бокарев УКМК, «Кузбассразрезуголь» кўмир компанияси, «Восточний порт» АЖ ва «Ростерминалуголь» АЖнинг назорат қилувчи бенефициарлари бўлишни тўхтатди, шунингдек, ушбу компанияларнинг директорлар кенгашидан чиқди. Кейинчалик Forbes Ўзбекистон ташқи ишлар вазирлигининг собиқ раҳбари Абдулазиз Камиловнинг ўғли Дониёр Камилов УКМКнинг янги бенефициар эгаси бўлганини маълум қилган. Компания июль ойидан бери АҚШ санкциялари остида турибди.
Санкциялар рўйхатига киритилган яна бир шахс — 1966 йилда Тошкентда туғилган Россия фуқароси Андрей Хохлун.
У, OFAC маълумотларига кўра, хорижий яримўтказгич технологияларини Россия микроэлектроника ишлаб чиқарувчи корхоналарига, шу жумладан, Россия мудофаа комплексини микроэлектроника билан таъминлайдиган корхоналарга ўтказишга ихтисослашган «Микротех» компаниясининг асосчиси ва бош директори ҳисобланади.
Ушбу компания июль ойидан бери санкциялар остида қолмоқда. «Қора» рўйхатга унинг яна иккита компанияси — Россиянинг «Кеко Р» ва Словениянинг Arktec компаниялари киритилган.
