«Ўзэнергоинспекция» ва бошқа ташкилотлар томонидан Самарқанд шаҳрида ўтказилган рейдда тизимга 9 млрд 852 млн сўмдан зиёд зарар келтирган майнинг ферма фаолиятига чек қўйилди, деб хабар бермоқда Энергетика вазирлиги матбуот хизмати.
Шаҳарда фаолият юритиб келаётган «G.B.M.» МЧЖ 47 дона майнинг қурилмасига эга майнинг фермаси фаолиятини ташкил этган. Аниқланишича, муассаса мебель ишлаб чиқариш цехи шаклида рўйхатдан ўтган, аммо у ерда яширинча майнинг фаолияти билан шуғулланиб келинган.
Қоидабузар истеъмолчига нисбатан белгиланган тартибда чора кўриш учун тегишли ҳужжатлар ҳуқуқни муҳофаза этувчи органларга тақдим қилинди, дейилади вазирлик хабарида.
Бир неча кун олдин вилоятнинг Пастдарғом туманида давлатга 2 млрд 237 млн сўм келтирган майнинг ферма аниқланганди.
Ўзбекистонда 2023 йилнинг 11 ойида 58,2 млрд сўмлик электрни ўғирлаш орқали майнинг фаолияти билан шуғулланиш бўйича 26 та ҳолат қайд этилган. Бунинг учун 29 киши ўғриликда айбланиб, процессуал тартибда ушланган.
