2023 йилнинг ўтган даврида электр энергиясини ўғирлаш орқали майнинг фаолиятини амалга ошириш бўйича 26 та ҳолат аниқланди. Бу ҳақда Бош прокуратура матбуот хизмати хабар бермоқда.
Мазкур ҳолатларда 58,2 млрд сўмга тенг бўлган 29 млн кВтли ёки 145 мингта хонадоннинг бир ойлик истеъмол эҳтиёжи учун зарур бўлган электр энергияси ўғирланган.
Бунинг учун 29 нафар шахсга нисбатан Жиноят кодексининг 169-моддаси (Ўғрилик) тегишли қисми билан жиноят ишлари қўзғатилиб, улар процессуал тартибда ушланган.
Майнинг фаолияти билан ноқонуний шуғулланиб, энергия ресурсларини жуда кўп миқдорда талон-торож қилиш Жиноят кодексининг 169-моддаси 4-қисми билан жиноят иши қўзатилишига ҳамда 8 йилдан 15 йилгача озодликдан маҳрум қилиш билан жазо тайинланиши мумкин, дея эслатма берди Бош прокуратура.
Шавкат Мирзиёев 31 октябрь куни бўлиб ўтган йиғилишда ҳудудларда электр энергияси ўғирланиши билан боғлиқ вазиятни танқид қилганди.
Хусусан, Навоий вилояти Кармана туманидаги қурилиши якунланмаган бинода 452 та майнинг қурилмаси ўрнатилгани оқибатида 10 ой давомида қарийб 5,5 млн кВт·с электрдан ноқонуний фойдаланилган. Бунинг оқибатида давлатга 24,4 млрд сўм зарар етказилган.
Президент туман ҳокими, прокурори, департамент бошлиғи, ички ишлар, электр тармоқлари раҳбарлари 10 ойда ҳудудда шунча электрдан ўғриликни пайқамагани учун ишдан олганди.
