Uzbekistan Airways авиакомпаниясининг Нью-Йоркдан Тошкентга учаётган самолёти Санкт-Петербург аэропортига фавқулодда қўниши оқибатида 22,2 минг доллар зарар кўрди, дея хабар бермоқда Транспорт ва туризм объектларида хавфсизликни таъминлаш департаменти матбуот хизмати.
11 декабрь куни Нью-Йоркдан Тошкентга учган Uzbekistan Airways самолёти бортида йўловчи зўравонлик қилгани сабабли Санкт-Петербург аэропортига фавқулодда қўнишга мажбур бўлган.
Таъкидланишича, самолёт «Пулково» аэропортига қўниши оқибатида компания 22 244 долларга тенг зарар кўрган.
Департамент маълумотларига кўра, Самарқанд вилоятида туғилган 32 ёшли фуқаро парвоз вақти ёнида бўлган 1 литр спиртли ичимликни ичиб, хавфсизлик қоидаларига риоя қилмасдан, йўловчилар тинчлигини бузган.
Мазкур шахсга нисбатан Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиш) билан жиноят иши қўзғатилди.
Ҳозирда дастлабки тергов ҳаракатлари олиб борилмоқда, дейилади хабарда.
