Тошкент шаҳар Ички ишлар бош бошқармаси бошлиғининг биринчи ўринбосари Дониёр Тошхўжаев 12 декабрь куни бўлиб ўтган матбуот анжуманида «кўча болалари» ва жиноий гуруҳлар вакиллари қандай қилиб товламачиликни амалга оширгани ҳақида гапирди.
Унинг айтишича, рейдлар давомида ушланганлар қарздор фуқаролардан қўрқитиш йўли орқали қўшимча пул ундиришган. Шунингдек, бир неча катта-катта корхоналардан улуш олиб юрганлари ҳақида маълумотлар ҳам бор.
«Дейлик, сиз яхши фаолият юритаётган, кўзга тушган тадбиркорсиз. Сиз ўрганиласиз, нозик жойингиз топилади. Қўпол қилиб айтганда, иккинчи аёлингиз ёки бошқа қандайдир заиф томонингиз бордир, балки. Шу билан сизни чақириб, сиқувга олишади. Шунча даромад топар экансан, менга шунча пул берасан, бермасанг, эртага сени у қиламан, бу қиламан деб қўрқитишади. Пулни бермасангиз, яна чақиради, атрофидаги спортсменлар билан уриб, дўппослайди ва бу охирги огоҳлантириш эканини айтади. Тадбиркор эса тинчлик керак деб, сўраган пулини олиб келиб беради. Улар бир неча катта-катта корхоналардан улуш олиб юрганлари ҳақида маълумотлар ҳам бор. [Улар устида] ишлаяпмиз», — деди Дониёр Тошхўжаев.
Пойтахт ИИББ вакили аслида бошқарма ходимлари шуғулланиши керак бўлган ишларни улар ўзига олгани, яъни давлатнинг функциясини ўзларига олиб олишганини таъкидлади.
«Кейин, қарздорлик масаласи. Айтайлик, бир фуқаро тадбиркорлик қиламан деб бошқа фуқародан 1 млн доллар қарз бўлиб қолган. [Лекин] ўзига яраша иши ўхшамай қолган. Булар давлатни функциясини ўзига оляптида, арз қилишганидан кейин қарздор одамни чақиряптида, „мана сенга икки ой вақт, пулни 1 млн эмас, 1 млн 200 минг қилиб олиб келасан, бўлмаса, у-бу бўлади“, деб куч ишлатиб, қўрқитишяпти. Бир тадбиркорни қулоғи остига уриб, қулоқ пардасини ёриб, шу ишга мажбурлаган. Шундай методларни ишлатишган», — деди у.
«Биз бундай уриб эмас, қонуний олиб бероламиз, вақт чўзилади, шунинг учун одамлар уларга ишонишяпти. Уларники тез битадида», — дея қўшимча қилди у.
Аввалроқ Дониёр Тошхўжаев бошқармада жиноий фаолиятда гумон қилиниб, қўлга олинган шахсларни жиноий жавобгарликка тортиш учун етарли далиллар мавжудлигини айтганди. У қўлга олинган шахслардан жабрланган фуқароларни «қўрқмасликка» ва ариза беришга чақирди.
