Тошкент шаҳри Мирзо Улуғбек туманидаги «Дархон» (собиқ «Сказка») боғи реконструкциядан сўнг фойдаланишга топширилди, деб хабар берди пойтахт ҳокимлиги матбуот хизмати.
Боғни ободонлаштириш ишлари 15 сентабрдан бошланган. Ёритиш тизими ва йўлаклар, мини-ҳовузлар қопламаси, ободонлаштириш ишлари янгиланди, ўриндиқлар, чиқинди қутилари ўрнатилди. Туташ ҳудудда болалар майдончаси ва кичик маёқ пайдо бўлди.
Фаоллар демонтаж пайтида сақлаб қолишга уринган ёғочдан ясалган ҳайкалларнинг бир қисми ўз жойига қайтарилди. Ҳокимлик «Газета.uz»нинг сўровига жавоб бераркан, уларнинг бир нечтаси йўқолгани, бири чириш оқибатида яроқсиз ҳолда келгани, қолган учтаси сақланиб қолгани ва «кейинчалик чиришга йўл қўймаслик учун» бетон супача (постамент)га ўрнатилганини таъкидлади.
Шаҳар ҳокимлигининг таҳририятга маълум қилишича, бажарилган ишлар суммаси 2,96 миллиард сўмни ташкил қилган. Пудратчи сифатида турар жой бўлмаган биноларни қуриш билан шуғулланадиган MDF Farmation компанияси иштирок этган.
