7 декабрь куни Ўзбекистоннинг Испаниядаги янги тайинланган фавқулодда ва мухтор элчиси Фаррух Турсунов Мадрид шаҳрига борди, деб хабар бермоқда «Дунё» ахборот агентлиги.
Дипломат 1973 йилда туғилган. Тошкент давлат иқтисодиёт университети, Стратегик таҳлил ва истиқболни белгилаш олий мактабини тамомлаган.
Фаррух Турсунов Ташқи ишлар вазирлиги тизимида 1994 йилдан буён турли лавозимларда ишлаган, жумладан, атташедан тортиб то департамент директори лавозимида фаолият олиб борган. Шунингдек, президент ҳузуридаги Хавфсизлик кенгашида, Қозоғистон (2008−2012 йиллар) ва Япониядаги (2012−2017 йиллар) элчихоналарга раҳбарлик қилган.
Тайинловга қадар у 2018 йилдан буён ТИВнинг Стратегик таҳлил ва прогнозлаш бош бошқармаси, шунингдек, Йиғма ахборот-таҳлил департаментини бошқариб келаётганди.
У Мадриддаги дипломатик миссияга 2017 йилдан буён раҳбарлик қилиб келган Жаҳонгир Ғаниев ўрнига тайинланди.
