Жиноят ишлари бўйича Мирзо Улуғбек туман судида кўчада 8 ёшли қизни ўпиб, унга нисбатан уятсиз-бузуқ ҳаракатлар қилган 63 ёшли эркак иши бўйича суд ҳукми эълон қилинди, дея хабар бермоқда Олий суд матбуот хизмати.
Ўзбекистонда зўравонликка қарши курашувчи Nemolchi.uz лойиҳаси эълон қилган видеода эркак кўчада қизча билан ёнма-ён ўтиргани, дастлаб унинг соч ва бўйин қисмидан силаганини кўриш мумкин. Уларнинг олдидан одамлар ўтаётганда эркак ҳаракатларини тўхтатиб, сўнг буни яна бир неча марта такрорлаган. Лавҳада, шунингдек, эркак қизнинг қаршилик кўрсатганига қарамай, уни ўпгани акс этган.
Мазкур иш жиноят ишлари бўйича Мирзо Улуғбек туман судининг судьяси С.Абдуғаниев раислигида Жиноят-процессуал кодексининг 19-моддаси (Судда жиноят ишларининг ошкора кўрилиши) талабларига мувофиқ ёпиқ суд мажлисида кўриб чиқилди.
Эълон қилинган суд ҳукмига кўра, 1960 йилда туғилган, пенсионер, муқаддам судланмаган М.И. Жиноят кодексининг 129-моддаси (Ўн олти ёшга тўлмаган шахсга нисбатан уятсиз-бузуқ ҳаракатлар қилиш) 3-қисмида назарда тутилган жиноятни содир этганликда айбли деб топилди.
Унга Жиноят кодексининг 50-моддаси (Озодликдан маҳрум қилиш) 6-қисми талабидан келиб чиққан ҳолда 5 йил 4 ой муддатга озодликдан маҳрум қилиш жазоси тайинланди. Тайинланган жазони умумий тартибли колонияда ўташ белгиланди.
«Биринчи инстанция судининг ҳукми устидан тарафлар қонунда белгиланган тартиб ва муддатда Тошкент шаҳар судининг апелляция инстанциясига шикоят бериш ва протест келтиришга ҳақли», — дейилади хабарда.
