Ўзбекистонда зўравонликка қарши курашувчи Nemolchi.uz лойиҳаси Тошкент шаҳрида ёши катта эркак кичик ёшдаги қизни унинг қаршилигига қарамасдан ўпиб, уятсиз-бузуқ ҳаракатлар содир этгани ҳақида ёзди.
Ҳавола қилинган видеода эркак кўчада қизча билан ёнма-ён ўтиргани, дастлаб унинг соч ва бўйин қисмидан силаганини кўриш мумкин. Уларнинг олдидан одамлар ўтаётганда эркак ҳаракатларини тўхтатиб, сўнг буни яна бир неча марта такрорлаган. Лавҳада, шунингдек, эркак қизнинг қаршилик кўрсатганига қарамай, уни ўпгани акс этган.
Тошкент шаҳри ИИББ ҳолат юзасидан муносабат билдирди. Аниқланишича, ҳолат 8 август куни тахминан соат 18:30 да содир бўлган. 63 ёшли М.И. Мирзо Улуғбек тумани Буюк ипак йўли кўчасидаги кўп қаватли уйлардан бирининг орқа тарафидаги йўл четида ўтирган 8 ёшли Ш. У.га нисбатан уятсиз-бузуқ ҳаракатлар содир этган.
ИИББ ҳолат бўйича жабрланувчининг ота-онаси томонидан ариза тушмаганини билдирди.
Ҳолат юзасидан Мирзо Улуғбек тумани ИИО ФМБ тергов бўлими томонидан Жиноят кодексининг 129-моддаси (16 ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилган.
Гумон қилинувчи процессуал тартибда ушланган. Тергов давом этмоқда, дейилади хабарда.
