Янги Зеландия ҳукумати келажак авлод учун чекишни тақиқлаш бўйича дунёдаги биринчи қонунни бекор қилди, деб ёзмоқда The Guardian.
2022 йил охирида қабул қилинган қонун 2009 йил 1 январдан кейин туғилган барчага сигарет сотишни тақиқлаши режалаштирилган эди. У 2024 йил июль ойида кучга кириши кутилганди.
Шунингдек, қонунда тамаки маҳсулотларида никотин концентрациясини камайтириш ва бутун мамлакат бўйлаб тамаки сотиш шохобчалари сонини 6000 тадан 600 тагача камайтириш кўзда тутилганди.
Расмийлар бундай қадамни солиқларни камайтириш мақсадида қилган, дея аниқлик киритган нашр.
Октябрь ойида мамлакатда умумхалқ сайлови бўлиб ўтган ва унда консерватив Миллий партия ғалаба қозонган. У бошқа кичик партиялар, жумладан, популистик Но NZ First билан коалиция тузган.
Миллий партия чет эллик харидорларнинг мулк бозорига қайтишига рухсат бериш орқали баъзи солиқ имтиёзларини молиялаштиришга умид қилган. Аммо NZ First ташаббусни рад этган.
Мамлакатнинг янги молия вазири Никола Уиллиснинг сўзларига кўра, энди сигаретлар сотишдан тушган даромад солиқларни камайтиришга йўналтирилади.
Аввалроқ Британия ҳукумати «чекмайдиган авлод»ни яратиш мақсадида Англияда 2008 йилдан кейин туғилганларга тамаки маҳсулотларини сотишни тақиқлашни режалаштирганди. Бу 2040 йилга бориб ёшлар орасида чекишни деярли тамомила тўхтатиш имконини бериши айтилган.
