Ўзбекистонда фармакологик воситанинг ёки дорининг клиник тадқиқотида соғлом шахслар ихтиёрий равишда иштирок этиши мумкин бўлди. Бу бўйича Шавкат Мирзиёев 22 ноябрь куни тегишли ўзгартиришларни ўз ичига олувчи қонунни имзолади.
Шундай қилиб, клиник тадқиқот раҳбари клиник тадқиқотда қатнашадиган шахсга тадқиқот усулининг аҳамияти, мазкур тадқиқотнинг моҳияти ва эҳтимол тутилган хавфи ҳақида батафсил тушунтириш бериши шарт.
Иштирокчи тадқиқотнинг исталган босқичида иштирок этишни рад этишга ҳақли.
Тадқиқотда вояга етмаган ёхуд муомалага лаёқатсиз шахс иштирок этганда, тадқиқотлар бошланишидан олдин унинг ота-онасидан ёки бошқа қонуний вакилларидан ёзма равишда розилик олиниши керак.
Вояга етмаган шахс иштирокидаги клиник тадқиқотдан олдин вояга етган шахсда клиник тадқиқот ўтказилган бўлиши керак.
«Қон ва унинг таркибий қисмлари донорлиги тўғрисида»ги қонунга ҳам ўзгартиришлар киритилмоқда. Донор қони ва унинг таркибий қисмларидан фармацевтика маҳсулотларини ишлаб чиқаришга ихтисослашган фармацевтика ташкилотларига донор қонини ва унинг таркибий қисмларини хусусий тартибда тўплаш, қайта ишлаш ва сақлашга рухсат этилади.
