Футбол бўйича Ўзбекистон миллий терма жамоаси 2026 йилги жаҳон чемпионатига саралаш турнирининг иккинчи босқичи иккинчи ўйинини Эронга қарши ўтказади. Учрашув 21 ноябрь куни соат 18:00да Тошкентдаги «Бунёдкор» стадионида бўлиб ўтади.
Миллий терма жамоа бош мураббийи Сречко Катанец душанба куни бўлиб ўтган матбуот анжуманида бўлажак ўйин ҳақида гапирди.
«Алоҳида аҳамиятли нарса йўқ. Барча футболчилар учрашувга тайёр. Эронга қарши муҳим ўйин бўлади, гуруҳдаги барча ўйинлар ҳам доим муҳим. Мен Эрон жамоасини жуда ҳурмат қиламан, улар Осиёнинг энг яхши термаларидан бири. Ҳатто жаҳон ва Европанинг бошқа кучли жамоалари ҳам Эронга қарши ўйинда қийинчиликка учрайди. Лекин ҳар қандай ҳолатда ҳам бу мен учун, футболчилар учун синов. Мен футболчиларни руҳлантиришим шарт эмас, улар ғалаба қозониш учун ҳамма нарсани қилади… Ҳар қандай ўйин 0:0 билан бошланади. [Ғалабага] ишончимиз комил», — деди Сречко Катанец.
Бош мураббий Ўзбекистон аввалги ўйинларда кўп гол ураётганини, Эронга қарши ўйин эса миллий терма жамоанинг бугунги савиясини синовдан ўтказишини таъкидлади.
«[Жаҳон чемпионати] саралаши бутунлай бошқача. Бу ерда ўртоқлик ўйинларидан фарқли ўлароқ, футболчиларга катта босим тушади. Эронлик футболчилар кўп йиллардан буён бирга ўйнаб келмоқда. Улар қачон камида битта футболчисиз ўйнаганини билмайман. Улар — жуда яхши жамоа. Асосан улар бир хил тизимда ўйнашади. Улар сизни [хато учун] жазолашлари мумкин. Эртагалик ўйинда устунлик кўрсатиб, хавфли бўлишимиз керак», — деди у.
Унинг сўзларига кўра, «агар мағлуб бўлсак, ҳеч нарса бўлмайди», чунки бу «одатий ўйинлардан бири». «Шунингдек, агар ғалаба қозонсак, яхши бўлади. Аммо 1−2 кундан кейин ҳаёт одатдагидек давом этади. Бу муҳим», — дейди 60 ёшли мутахассис.
Ўзбекистон терма жамоаси Эронга қарши сўнгги 12 та тўқнашувда атиги битта ғалабага эришган, бир марта дуранг ўйнаган ва 10 марта мағлубиятга учраган. Ўзбекистон терма жамоаси рақиб дарвозасига 3 та тўп киритиб, 16 та гол ўтказиб юборган.
