Афғонистонда кўкнори етиштириш «Толибон» ҳукумати томонидан жорий этилган тақиқдан кейин 95 фоизга камайди, дейилади БМТнинг Наркотиклар ва жиноятчилик бўйича бошқармаси янги ҳисоботида. БМТ экспертларининг фикрича, бу Афғонистоннинг ўзи учун ҳам, бутун дунё учун ҳам катта аҳамитга эга.
2022 йил апрель ойида «Толибон» бутун Афғонистон бўйлаб фермерларга кўкнори етиштиришни тақиқлаб, қоидабузарлар шариат қонунлари бўйича жазоланишини эълон қилганди.
БМТ маълумотларига кўра, 2023 йилда мамлакатнинг барча ҳудудларида кўкнори етиштириш 233 минг гектардан 10,8 минг гектаргача қисқарган. Натижада кўкнори етказиб бериш 2022 йилдаги 6200 тоннадан жорий йилда 333 тоннагача қисқарди.
Ҳисоботда таъкидланишича, кескин қисқариш кўкнори етиштиришдан даромад оладиган кўплаб қишлоқ жамоалари учун салбий оқибатларни келтириб чиқарган.
Мутахассислар 2023 йилгача кўкнори маҳсулотлари экспорти одатда мамлакат қонуний экспорти қийматидан ошиб кетганини ҳисобга олиб, кўкнори иқтисодининг умумий қисқариши бутун Афғонистон иқтисодиётига таъсир қилишини кутмоқда.
Шу билан бирга, БМТ таъкидлаганидек, кўплаб афғон фермерлари буғдой етиштиришга ўтган, бунинг натижасида Фараҳ, Хилманд, Қандаҳор ва Нангаҳор вилоятларида ғалла экинлари 160 минг гектарга кўпайган. Ҳисоботда айтилишича, буғдой етиштириш озиқ-овқат хавфсизлигини енгиллаштириши мумкин, аммо ҳосил кўкнорига қараганда анча кам даромад келтиради.
