Uzbekistan Airports Сергели туманида ёш споттерларнинг ҳуқуқ-тартибот органлари томонидан ушланиши юзасидан расмий баёнот берди.
«Воқеа Тошкент шаҳрининг Сергели туманидаги Қумариқ маҳалласи ҳудудида содир бўлган. Болалар ҳаво бандаргоҳи чегараларини бузмаган ҳолда Тошкент халқаро аэропорти панжараси ортида туриб самолётларни суратга олган», — дейилади баёнотда.
«Uzbekistan Airports Ўзбекистондаги споттинг ҳаракатини қўллаб-қувватлайди ва ёш авлодни ушбу хобби билан шуғулланишига тўсқинлик қилмайди», — дейди компания.
«Йил бошидан буён Тошкент аэропорти ҳудудида 30 га яқин режали ва режадан ташқари споттинг-турлар ташкил этилди. Шунингдек, жорий йилнинг 14 октябрь куни бўлиб ўтган режали кузги споттингда 6 ёшдан 15 ёшгача бўлган 12 нафар болалар қатнашганини ҳам алоҳида таъкидлаш лозим», — деди Uzbekistan Airports.
Компания 2022 йил 26 январда Вазирлар Маҳкамасининг «Ависпоттингни ривожлантириш учун шарт-шароитлар яратиш чора-тадбирлари тўғрисида»ги қарори билан Ўзбекистонда споттинг ҳаракати расман қонунийлаштирилганини эслатиб ўтди.
Эслатиб ўтамиз, мазкур қарор «Газета.uz»нинг споттинг ҳаракати ва уларга дуч келиши керак бўлган тушунарсиз тақиқ ва таҳдидлар ҳақидаги мақоласидан сўнг қабул қилинган эди.
Тошкентдаги расмий идоралар ҳозирча болаларнинг ҳибсга олиниши юзасидан ҳеч қандай баёнот бермади. Аввалроқ болалар уларни бақириб, сўкишгани, дўқ-пўписа қилишиб, техникаларини олиб кетишганини айтишганини хабар қилгандик. Олти нафар болани машинада бошқа жойга олиб кетишган
Ушланганларнинг «Газета.uz»га айтишича, воқеа ОАВда ошкор бўлгач, уларга нисбатан муносабат юмшаган.
Мамлакатда турли объектларни суратга олиш бўйича умумий вазият юмшатилганига қарамай, Ўзбекистонда ҳам шунга ўхшаш ҳодисалар кўп йиллардан буён содир бўлмоқда. Суратга олиш учун споттерлар қўлланиладиган жойларда суратга олишни тақиқловчи белгилар мавжуд эмас.
