31 октябрь куни АҚШ халқаро тараққиёт агентлиги (USAID) Ўзбекистон Соғлиқни сақлаш вазирлиги ва Аbt Associates билан ҳамкорликда «Силдан холи Ўзбекистон» 5 йиллик ташаббусини бошлади. Бу ҳақда «Газета.uz»га АҚШнинг Тошкентдаги элчихонаси хабар берди.
Унга кўра, бутун мамлакат бўйлаб кенг қамровли қўллаб-қувватлаш хизматларини тақдим этиш ва туберкулёзга қарши муҳим дори воситаларидан фойдаланиш имкониятини кенгайтириш учун 18 миллион доллар сармоя киритилмоқда.
Қайд этилишича, Ўзбекистон соғлиқни сақлаш тизимига, шунингдек, аҳоли саломатлиги ва мамлакатнинг иқтисодий ривожланишига катта хавф туғдирадиган кўп дориларга чидамли туберкулёз касаллигининг юқори кўрсаткичларига дуч келмоқда.
«Ўзбекистон барқарор ривожланмоқда, аммо туберкулёз касаллиги аҳоли саломатлиги учун энг жиддий таҳдидлардан бири бўлиб қолмоқда», — дейилади элчихона хабарида.
Соғлиқни сақлаш вазирлиги маълумотларига кўра, 2022 йилда мамлакатда туберкулёз касаллигининг янги ҳолатларининг 8 фоизи даволаш учун энг кўп ишлатиладиган ва самарали ҳисобланадиган иккита дори воситасига қаршилик кўрсатган.
USAIDнинг 2023−2030 йилларга мўлжалланган глобал туберкулёзга қарши стратегияси туберкулёздан холи дунё хақидаги умумий тасаввуримизни рўёбга чиқаришга қаратилган. Дунёдаги энг йирик икки томонлама донор сифатида USAID туберкулёз касаллигини йўқ қилиш бўйича саъй-ҳаракатларни тезлаштириш учун янги инновациялар ва тадқиқотлардан фойдаланади, дейилади хабарда.
1993 йилдан 2023 йилгача АҚШ хукуматининг Ўзбекистонга соғлиқни сақлаш сохасидаги ёрдамининг умумий миқдори 155 миллион доллардан зиёдни ташкил этди, шундан қарийб 60 миллион доллари туберкулёз касаллигига қарши курашга йўналтирилди.
«Силдан холи Ўзбекистон» лойиҳаси АҚШ хукуматининг сил касаллигини олдини олиш, аниқлаш, даволаш, туберкулёз касаллигини стигматизациясини камайтириш, шунингдек, тиббий ахборот тизимларини такомиллаштириш, шу жумладан, соғлиқни сақлашни молиялаштириш бўйича ислоҳотларга қатъий содиқлигини тасдиқлайди, — деб таъкидлайди дипломатик миссия.
Эслатиб ўтамиз, Тошкентга ташриф буюрган USAID администратори Саманта Пауэр Ўзбекистон халқини қўллаб-қувватлаш учун 14 млн доллардан ортиқ маблағ ажратилишини маълум қилганди. Хусусан, маблағлар сил касаллиги, эпидемия ва пандемия таҳдидига қарши кураш, шунингдек, хусусий секторни мустаҳкамлашга йўналтирилади.
