Ноябрь ойи бошида президент Макрон Қозоғистонга ва Ўзбекистонга ташриф буюради. Bloomberg`нинг қайд этишича, сафардан мақсад Марказий Осиёдан энергия етказиб бериш орқали Франциянинг энергетик хавфсизлигини мустаҳкамлашдан иборат.
Франция Россиянинг қазиб олинадиган ёқилғи импортига қарамликни камайтиришга интилмоқда.
Ядро ёқилғисининг янги етказиб берувчиларини топиш зарурати Европа бозорига ураннинг иккинчи йирик экспортчиси бўлган Нигерда июлдаги давлат тўнтаришидан кейин кучайди. Яқинда Франциянинг Орано компанияси ҳарбий хунтага қарши халқаро санкциялар жорий этилиши билан боғлиқ логистик муаммолар туфайли Нигерда уран рудасини қайта ишлашни тўхтатишга мажбур бўлди.
Елисей саройи вакилига кўра, Эммануэль Макрон энергетика, қишлоқ хўжалиги ва тоғ-кон саноати соҳаларининг 15 нафар бизнес раҳбарларидан иборат делегация билан Марказий Осиёга боради.
Хусусан, Electricite de France SA коммунал компанияси ва ядровий реакторларни қуриш бўйича экспертиза билан шуғулланувчи Assystem SA инжиниринг компанияси вакиллари келади.
Spot`нинг ёзишича, 2022 йилда Ўзбекистон Европага уран экспортини қарийб уч бараварга — 441 тоннагача оширган. Бунга Европа компанияларининг Россиядан олинадиган ядро ёқилғисини бошқа мамлакатлардан етказиб бериладиган альтернативи билан алмаштириши туртки бўлди.
