АҚШ президенти администрацияси Европа Иттифоқи ва унга аъзо давлатларни Марказий Осиёнинг айрим давлатларидан келган саёҳатчиларга нисбатан кескин чоралар кўриши ҳақида огоҳлантирди. Бу ҳақда Bloomberg хабар қилди.
Нашр қайд этишича, бу эҳтимолий террорчиларнинг АҚШга киришини олдини олишга қаратилган. Огоҳлантириш бир гуруҳ муҳожирлар «ИШИД»га алоқадор контрабандачи ёрдамида АҚШга жануби-ғарбий чегарадан кириб келган воқеадан кейин берилган.
Бу Европа аэропортлари орқали транзит ўтаётган йўловчиларнинг Қўшма Штатларга ноқонуний йўллар билан киришга уринишлари билан боғлиқ хавотирларни кучайтирди. АҚШ расмийлари Европа Иттифоқидан Ўзбекистон ва Тожикистон фуқаролари учун аэропорт транзит визаларини талаб қилишни сўраган.
Аввалроқ CNN ИШИДга алоқадорликда гумон қилинган контрабандачи ўзбекистонлик бир гуруҳ муҳожирларга Мексика орқали АҚШга киришга ёрдам бергани ҳақида хабар берганди.
ФҚБ ушбу тармоқ орқали АҚШга кирган барча муҳожирларни ҳали аниқлаб бўлганича йўқ ва камида 15 нафар Ўзбекистондан келган муҳожирни қидириб топишга ҳаракат қилмоқда. Ўшанда жами 120 га яқин ўзбекистонлик чегарани кесиб ўтган, деб хабар беради Reuters. Бюро уларни «потенциал жиноий таҳдидлар» манбалари сифатида кўради, деб таъкидлайди CNN.
