Россия президенти Владимир Путин 6 октябрь куни Кремлда Ўзбекистон президенти Шавкат Мирзиёев билан бўлиб ўтган учрашувда «Россия-Доғистон» алоқалари ривожи учун унга миннатдорчилик билдирди.
Унинг сўзларини ТАСС агентлиги тарқатган икки президент музокаралари акс этган видеоёзувда эшитиш мумкин. РФ раҳбарининг хатосига ««Новая газета Европа» нашри эътибор қаратди.
«Россия-Доғистон муносабатларини ривожлантиришдаги шахсий иштирокингиз учун сизга миннатдорчилик билдирмоқчиман. Бу ривожланиш барча йўналишларда яхши динамикага эга», — деди Путин Катта Кремль саройидаги тор доирадаги учрашув аввалида.
Кремль сайтида эълон қилинган президентлар ўртасидаги суҳбат стенограммасида «Россия-Доғистон алоқалари» ибораси «Россия-Ўзбекистон алоқалари» деб тўғриланган.
Ижтимоий тармоқларда президентлар хонага ўз мамлакатлари делегациялари жойлашган томондан эмас, қарама-қарши томондан кириб келганига ҳам эътибор қаратилди.
