Шавкат Мирзиёевнинг АҚШга ташрифи доирасида ташкил этилган АҚШ-Ўзбекистон бизнес форумида «Ўзбекэнерготаъмир» АЖ АҚШнинг General Electric Global Parts and Products GmbH корпорацияси билан 60 млн долларлик шартнома имзолади, дея хабар берди акциядорлик жамияти матбуот хизмати.
Ҳамкорлик электр станцияларининг амалдаги энергоблоклари модернизация қилинишни назарда тутади. Шунингдек, шартнома доирасида электр станцияларига техник хизмат кўрсатишдан ташқари, янги эҳтиёт қисмлар етказиб берилади ва демонтаж қилинган эҳтиёт қисмларини тиклаш ишлари амалга оширилади.
«Бу билан биз мамлакатимиз электр энергетикаси тармоғига замонавий, юқори ривожланган ва энергосамарадор ускуналарни олиб кирамиз, соҳадаги энг илғор технологияларни ўзимизда жорий этиш, натижада ёқилғи сарфини камайтириш ва ишлаб чиқаришни рақамлаштириш эвазига маҳсулотнинг якуний нархини пасайтиришга эришамиз», — дейди «Ўзбекэнерготаъмир» бош директори Илҳом Ражабов.
Музокараларда, шунингдек, «Ўзбекэнерготаъмир»нинг ёш ходимлари америкалик мутахассислар иштирокида бажариладиган таъмирлаш ва созлаш ишлари орқали малака ошириши бўйича ҳам келишувга эришилган.
Маълумот ўрнида, «Ўзбекэнерготаъмир» корхонаси энергетика ускуналарини таъмирлаш билан шуғулланувчи корхона ҳисобланиб, 1967 йилда Марказий Осиё, Қозоғистон ва Озарбайжон республикалари электр станцияларининг энергетика ускуналарини таъмирлаш мақсадида ташкил этилган.
Компания 9 та ишлаб чиқариш участкаси, 4 та ишлаб чиқариш цехи, 2 та лаборатория (электр, металл ва пайвандлаш), метрология хизмати, умумий ишлаб чиқариш майдони 8 гектарга тенг ҳудудни ўз ичига олади. Ишлаб чиқариш базаси 85 та станок жиҳозлари билан жиҳозланган.
