Ўзбекистон Олий Мажлиси Қонунчилик палатаси депутатлари Жиноят, Жиноят-процессуал ва Маъмурий жавобгарлик тўғрисидаги кодексларга ўзгартиш ва қўшимчалар киритиш тўғрисидаги қонун лойиҳасини иккинчи ўқишда кўриб чиқди, дея хабар берди парламент қуйи палатаси матбуот хизмати.
Ўзгартиришларга кўра, Маъмурий жавобгарлик тўғрисидаги кодексга мобил қурилманинг халқаро ягона идентификация кодини (IMEI) ёки абонент қурилмасининг идентификация модулини ноқонуний равишда ўзгартирганлик ёки нусхалаганлик, шунингдек криптоактивлар айланмаси ва ноқонуний майнинг соҳасидаги қонун ҳужжатларини бузганлик учун жавобгарлик киритилади.
Қонун лойиҳасининг биринчи ўқиши 5 сентябрь куни бўлиб ўтган, ўшанда лойиҳа депутатлар томонидан концептуал жиҳатдан қабул қилинган ва кейин депутатлар, экспертлар ва ҳуқуқшуносларнинг таклифларини инобатга олган ҳолда такомиллаштирилганди. Бугун депутатлар томонидан қонун лойиҳаси қабул қилинди.
Эслатиб ўтамиз, жорий йилнинг февраль ойида Тошкент ИИББ Ўзбекистонда мобил қурилмаларнинг IMEI-кодларини ноқонуний клонлаш учун маъмурий ва жиноий жавобгарлик жорий этиш режалаштирилаётганини маълум қилган эди.
Бошқарма маълумотларига кўра, сўнгги вақтларда фуқароларнинг уяли телефон аппарати йўқолгани ҳақидаги хабарлар кўпаймоқда. Воқеа тафсилотларини аниқлаш учун ҳуқуқни муҳофаза қилувчи орган ходимлари терговга қадар текширув ўтказади, жиноят аломатлари бўлса, жиноят иши қўзғатилади.
Майнинг масаласига келсак, президент томонидан сентябрь ойи бошида имзоланганқонунчиликка киритилган ўзгартиришларга кўра, эндиликда мазкур фаолият учун рухсатнома Истиқболли лойиҳалар миллий агентлиги томонидан берилади. Бундан ташқари, ИЛМА криптобиржа, майнинг-пул, криптодепозитарий ва криптодўкон фаолияти учун лицензияловчи органга айланди.
