Тошкент шаҳри Яшнобод туманида уй-жой билан боғлиқ фирибгарлик юз бергани, 9 та хонадон 39 кишига сотилгани ҳақида «Дарё» суриштируви эълон қилинганди. Бош прокуратуранинг маълум қилишича, ҳолат юзасидан пойтахт прокуратураси терговга қадар текширув ҳаракатларини ўтказмоқда.
Мақолада кўрсатилган ҳолатлар тўлиқ, холисона ўрганилиб, якуни бўйича қонуний қарор қабул қилинади, дейилади БП хабарида.
Ўзи нима гап?
Қайд этилишича, бир гуруҳ фуқаролар Zohmir Group номли қурилиш компанияси устидан шикоят қилган. Унда янги қурилаётган 9 та хонадондан иборат 3 қаватли уй 39 нафар фуқарога пуллангани келтирилган.
Фуқароларнинг сўзларига кўра, улар Zohmir Group компаниясига пулларни нотариус орқали топширган. Шартномалар ҳам қилинган.
Мурожаатчининг маълум қилишича, қурилаётган уйнинг олди-сотди қилиш шартномаси 2020 йил тузилган бўлиб, у 2 хонали уйга 190 миллион (ўша пайтдаги қийматга кўра, 17 минг доллар) тўлаган.
«Қурилиш ташкилоти бизга ваъда қилган уйларни 2022 йилнинг май-июнь ойларида топшириши керак эди. Лекин 2023 йил келди ҳамки, уй қурилиши қандай ҳолатда бўлса, шундай турибди. Ҳеч нарса ўзгармаган. Биз айтилган муддатдан ўтгач, қурувчидан уйимиз қани, қачон тайёр бўлади деб сўраганимиздан сўнг бошқа қизиқ-қизиқ муаммолар пайдо бўлмоқда. Аниқланишича, бизга сотилган уйлар яна 4−5 кишига сотилган экан», — дейди мурожаатчилардан бири.
Фуқаролар улардан Азиз Алиев исмли шахс пулларни олганини билдирди.
«Кейин билсак, улар кўпчилик экан. Улар уюшган гуруҳ тузиб, пулларимизни бошқа соҳага ишлатиб юборишганми, биздан қочиб юришибди. Уларни тополмаяпмиз. Шу сабаб ички ишларга, прокуратурага мурожаат қилдик», — дейди улар.
Фуқаролардан бири 2 хонали уй учун 25 минг доллар пулни олдиндан тўлагани маълум қилган.
Яна бир мурожаатчи мазкур қурилиш компаниясидан уй олиш ниятида тўлов қилган фуқаролар уй олиш учун яшаб турган хонадонларини ҳам сотгани ва айни кунда кўчада қолганини таъкидлаган.
Мурожаатдан сўнг суриштирув доирасида фуқароларни алдагани айтилаётган Азиз Алиев билан суҳбатлашилган. У норози фуқароларнинг пуллари қайтариб берилаётгани, уй аслида 5 қаватли бўлиши керак бўлганини таъкидлаган.
«Лекин уйни 3 қават қилиб қурдик. Уйнинг қаватлари сони ўзгаргач, лойиҳани ўзгартирдик. Шу сабаб фуқароларнинг пулларини вақтида қайтариб беролмадик. Айни кунга келиб, кўпчилигининг пулини қайтариб бердик», — деган Азиз Алиев.
Қурилиш ташкилоти раҳбари 39 кишидан пул олганини, анчасига маблағи қайтарилганини тасдиқлаган. Аммо 9 та хонадон 39 кишига сотилганини рад этган.
«Уй-жой учун Азиз Алиевга нақд пул тўлаган фуқаролар нотариус орқали буни тасдиқлатиб, қарз шартномаси тузилганини билдирди. «Дарё»нинг бу ҳақдаги саволларига жавоб қайтарган нотариус қарз шартномаси фуқароларнинг уй учун тўлов қилганини тасдиқлаб, пулларнинг қачон қайтарилиши ҳам кўрсатилганини айтди. Фуқароларнинг пул бергани қарз шартномаси орқали тасдиқланади. Ва бу пуллар қачон қайтарилиши лозимлиги ҳам шартномада кўрсатилган бўлади. Пул олди-бердиси нотариус орқали тасдиқлангани фуқароларнинг ютуғи бўлган аслида», — дейилади мақолада.
Аввалроқ бир гуруҳ тошкентликлар 8 та уй қураётган Aziya Invest Favorit устидан президентга мурожаат йўллаганди. Унга кўра, компания кредит олиш мақсадида сотилган квартираларни гаровга қўйган, банклар эса кредит тўланмангани учун уй-жойларни олиб қўйган. 1000 киши кўрган зарар 300 млрд сўмдан ошиши мумкинлиги келтирилган.
Шундан сўнг Тошкентдаги 1100 га яқин алданган ҳиссадорлар муаммосини ҳал этиш учун тузилган ҳукумат комиссияси банкка гаровга қўйилган квартираларни қурувчининг бошқа мулкларига алмаштириш, қурилишни бошқа қурувчиларни жалб этган ҳолда якунлаш ёки мулкни сотиш орқали етказилган зарарни қоплашни таклиф қилган.
