Ўзбекистон терма жамоаси Counter-Strike: Global Offensive (CS:GO) компьютер ўйини бўйича IESF World Esports Championship 2023 яримфиналига йўл олди. Турнир Руминиянинг Ясси шаҳрида 25 августдан 9 сентябргача бўлиб ўтади, унда дунёнинг 24 та жамоаси иштирок этади. Соврин жамғармаси 100 минг долларни ташкил қилади.
Ўзбекистонликлар Осиё ва Океания чемпионатларида ғалаба қозониб, жаҳон чемпионатига йўлланма олганди. Бу гал жамоа Тунис (16:3), Дания (16:7), Украина (16:11), Колумбия (16:7) ва Саудия Арабистони (16:3) терма жамоаларини мағлубиятга учратиб, жаҳон чемпионатининг гуруҳ босқичи ўйинларини мағлубиятсиз ўтказди, деб хабар берди Киберспорт ассоциацияси.
Ўзбекистон 3 та ўйин якунига кўра Венгрияни 2:1 ҳисобида мағлуб этиб, чорак финалга йўл олди. Жамоа de_anubis (16:13) ва de_mirage (16:7) баҳсларида устунлик қилди, лекин de_inferno (9:16) баҳсида мағлуб бўлди. Энг яхши натижани Даниэль Ли (icyvl0ne) кўрсатди.
Яримфиналда терма жамоа Германия/Дания жуфтлиги ғолиби билан тўқнаш келади. Ўйин 2 сентябрь куни бўлиб ўтади.
Ўзбекистон терма жамоаси шарафини таркибидан Руслан Гизатов (fr0k ники остида ўйнайди), Амирбек Тимуров (wetfy), Тимофей Ким (aokiflame), Даниэль Ли (icyvl0ne), Иброҳим Абдуқодиров (kanshineF) ва асосчиси Тимур Меметов ўрин олган TT.Team (Traffic Tashkent Team) жамоаси ҳимоя қилади.
