Интернет фойдаланувчилари Google харитада Тошкентдаги бир қатор мактаблар номларини киноюлдузлар, қўшиқчилар, киноқаҳрамонлар, бошқа машҳур шахслар, шунингдек, интернет-мемлар шарафига қайта номлади.
Агар харитага кириб, «номидаги мактаб» («школа имени») деб қидирилса, бир нечта исмлар ва номларни учратиш мумкин: Райан Гослинг номидаги иккита мактаб, Бред Питт, Жейсон Стейтем, Кендрик Ламар, Жозеф Жостар, Патрик Бэйтмен, Скотт Коутон, Алексей Навальний, улуғбекозавр, «бабулинг» ва «оғмахон, шиншилла, денгиз чўчқаси ва тушканчик» номидаги мактаблар.
Манба: Instagram «Газета.uz».
Тошкент шаҳри мактабгача ва мактаб таълими бошқармаси 61-мактабга Райан Гослинг номи берилганини «ёлғон» деб, бу бўйича раддия эълон қилди.
«Бугунги кунда пойтахтнинг 12 та туманида 232 та умумтаълим мактаби мавжуд. Уларнинг ҳеч бирига алоҳида ном берилмаган», — дейилади хабарда.
Манба: Instagram «Газета.uz».
Мактабларнинг «номини ўзгартириш» ёшлар ўртасидаги челленжга ўхшайди, улар шу йўл билан ўз мактабини бошқалардан ажратиб кўрсатиш ва бошқаларга қараганда «зўрроқ» эканини намойиш этишга уринаётгандек, дейди «Газета.uz» ўқувчилардан бири. Унинг айтишича, бундай ҳолатларни бошқа мамлакатларда ҳам кузатиш мумкин.
Google харитадаги ҳар қандай рўйхатдан ўтган фойдаланувчи объектлар номини ўзгартириши мумкин.
