Хитой Миллий статистика бюроси ёшлар ўртасидаги ишсизлик даражаси ҳақидаги маълумотларни чоп этишни тўхтатишини эълон қилди. Бу ушбу кўрсаткич рекорд даражага кўтарилганидан кейин содир бўлди, дея хабар бермоқда BBC.
«Иқтисодиёт ва жамият доимо ривожланиб, ўзгариб бормоқда. Статистик фаолият ҳам доимий равишда такомиллашишга муҳтож», — дея тушунтирди бюро матбуот котиби Фу Линхуэй.
Июнь ойида шаҳарларда яшовчи 16 ёшдан 24 ёшгача бўлган ёшлар ўртасидаги ишсизлик рекорд даражадаги 21,3 фоизга етган эди. Июлда ҳам мамлакатдаги умумий ишсизлик даражаси 5,2 фоиздан 5,3 фоизга кўтарилди.
BBC рус хизматининг қайд этишича, Хитой ҳукумати пандемия даврида ўлим ҳақидаги маълумотларни нашр этишни тўхтатган, аммо иқтисодий кўрсаткичлар илгари яширилмаган.
The New York Times газетаси Хитой ҳукумати ёшлар бандлигини ошириш бўйича чоралар кўргани, бироқ «иқтисодий жавоб секин бўлган»ини ёзди. Хусусан, ҳокимият шаҳарларда бандликнинг 80 фоизини таъминлайдиган хусусий компанияларга субсидиялар таклиф қилган.
Нашрнинг изоҳ беришича, бугунги кунда Хитойда ёшлар ишчи кучига бўлган талаб ва таклиф ўртасида катта тафовутга дуч келишмоқда. Коронавирусга қарши кураш бўйича қатъий чоралар, шунингдек, ҳукуматнинг корхоналарга босими оммавий ишдан бўшатишга олиб келди. Шунингдек, хитойлик битирувчилар одатда борадиган технология, кўчмас мулк, таълим ва кўнгилочар компанияларнинг кенгайиши шубҳа остига қўйилди.
Хитой иқтисодиётининг сўнгги кўрсаткичлари унинг ўсиш суръати пасайганидан далолат беради, деб ёзади The Guardian. Истеъмолнинг асосий кўрсаткичи бўлган чакана савдо таҳлилчилар кутганидан паст бўлиб, июль ойида ўтган йилнинг шу даврига нисбатан атиги 2,5 фоизга ўсган.
Газетанинг қайд этишича, бундай маълумотлар Хитойнинг жорий йил учун белгиланган 5 фоизлик ўсиш кўрсаткичига эришишда қийинчиликларга дуч келиши мумкинлигини кўрсатади. Расмий маълумотларга кўра, дунёнинг иккинчи йирик иқтисодиёти 2023 йилнинг биринчи ва иккинчи чораклари орасида атиги 0,8 фоизга ўсган.
