Вазирлар Маҳкамасининг 2021 йил 21 апрелдаги «Йўл ҳаракати хавфсизлигини таъминлаш соҳасига хусусий секторни жалб этишга доир қўшимча чора-тадбирлар тўғрисида»ги қарорига ўзгартиришлар киритилди, деб хабар бермоқда ЎзА.
Эндиликда тизимга юборилган маълумотлардаги хатоликларнинг умумий сони 5 ва ундан ортиқ фоизни ташкил этган тақдирда, тадбиркорлик субъектининг объектга нисбатан бўлган мулк ҳуқуқи бекор қилинади. Камераларга эгалик ҳуқуқидан маҳрум қилиш тўғрисидаги қарор суд томонидан қабул қилинади.
Бундан ташқари, ҳужжатга кўра, эндиликда тадбиркорлик субъектлари томонидан автомобиль йўлларида йўл ҳаракати қоидалари бузилганини махсус автоматлаштирилган фото ва видео қайд этиш дастурий-техник воситаларини ўрнатиш ва ишга тушириш муддатини 60 кундан 180 кунга узайтирилади.
Бироқ тадбиркор аукционда ғолиб бўлгани тўғрисидаги билдиришномани олган кундан бошлаб 90 кун ичида объектда дастурий-техник воситаларни ўрнатиш билан боғлиқ бирор-бир ҳаракат (қурилиш-монтаж ишлари)ни амалга оширмаса, келишув суд орқали бекор қилинади.
Эслатиб ўтамиз, тадбиркорлик субъектларига 2021 йил 1 мартдан бошлаб йўлларга камералар ва радарлар ўрнатишга рухсат берилганди. Ер участкаларини ажратиш онлайн аукционлар орқали аниқланади. Ғолиблар бошқа тадбиркорларга ўтказиш ҳуқуқи билан чекланмаган муддатга жой олади.
Spot нашрининг ёзишича, 2021−2022 йилларда аукционда бундай лотлар нархи баъзан ўнлаб ёки юзлаб марта ошган. 2021 йил июль ойида Хоразмдаги участка 40 миллион сўмга ёки бошланғич баҳосидан 27 баробар қимматроққа сотиб олинган бўлса, бир ой ўтиб икки компания Тошкентдаги бир нуқта учун 3,5 миллиард сўм таклиф қилган.
2022 йил февраль ойида онлайн савдоларда пойтахтдаги 92 та камера ва радар жойлари сотилди. Лотларнинг умумий якуний қиймати 66,61 млрд сўмни ташкил этди, бу бошланғич нархлардан 168 баробар қимматроқ.
