Интернетда бир гуруҳ аёллар Тошкент вилоятининг Ангрен шаҳридан ўтувчи А-373 йўлини тўсиб қўйгани акс этган видео тарқалди.
Шаҳар ҳокимлигининг хабар беришича, бу 10 июль куни содир бўлган. Sungreen Tex текстиль фабрикаси ходимлари беш иш кунидан олти иш кунига ўтиш тартибига (режимига) ўзгартирилишига норозилик билдириб, «Оҳангарон» кўчасини тўсиб қўйишган.
Алишер Раимов бошчилигидаги раҳбар ва мутасаддилар воқеа жойига етиб келишган ва ишчи-ходимларнинг эътирозини тинглаб, корхона раҳбариятига мурожаат қилишган.
«Корхона маъмурияти ўртасида бўлиб ўтган ўзаро мулоқотлар ишчи-ходимларнинг фойдасига ҳал бўлган. Муаммо жойида бартараф этилган», — дейилади хабарда.
Sungreen Tex қўшма корхонаси 2010 йил июль ойида ташкил этилган. Кийим-кечак, жумладан, болалар кийимлари, тўқимачилик материаллари ва ип-калава ишлаб чиқариш билан шуғулланади. Маҳсулотларнинг асосий қисми экспорт қилинади.
Заводда 750 га яқин киши ишлайди. Таъсисчилар — Владислав Музика (54,2%) ва Наталья Асташова (45,8%).
