17 июлга ўтар кечаси Қрим кўпригида портлаш содир бўлди, дея хабар бермоқда «Медуза».
«ВКонтакте»даги рус пабликлари ва рус блогерлари каналларида кўприкда Россия вақти билан соат 3:04 ва 3:20 да иккита портлаш содир бўлгани ҳақида хабар тарқалди.
Россия томонидан аннекция қилинган Қрим раҳбари Сергей Аксенов соат 4:21 да Краснодар ўлкасидан 145-таянч ҳудудида юз берган «фавқулодда ҳолат» туфайли кўприкда ҳаракат тўхтатилганини маълум қилди.
Россия Транспорт вазирлигининг маълум қилишича, кўприкнинг Қрим томонидаги йўлаги шикастланган, аммо йўлакларнинг таянч устунлари зарарланмаган. Ҳуқуқ-тартибот идоралари ҳозирча ҳодиса сабабларига изоҳ бермади.
Россия томонидан берилган расмий маълумотларга кўра, икки нафар одам ҳалок бўлган, бир нафар бола жароҳат олган. Жароҳатланган қизча ҳозирда реанимация бўлимида, дея хабар берди «РИА Новости». Ҳалок бўлганлар унинг ота-онаси бўлган.
Россия транспорт вазирлиги кўприкдан ўта олмаётган автомобилларга «муқобил йўналиш» орқали ҳаракатланишни тавсия қилди.
Аннекция қилинган Қрим раҳбари маслаҳатчиси Олег Крючков Қрим шарқида сайёҳлар учун вақтинчалик жойлаштириш марказлари очилишини маълум қилди. Унинг сўзларига кўра, бу пунктларда сайёҳлар «муқобил йўналиш, темир йўл алоқаси ва паром қатнови бўйича исталган ёрдам ва маълумотларни олишлари» мумкин бўлади. Шунингдек, дам олувчилардан иложи бўлса меҳмонхона ва санаторийларда қолиш сўралган.
Қрим парламенти раҳбари Владимир Константинов кўприкдаги портлашда Украина томонини айблади.
«Бугун тунда Киевдаги террор режими янги жиноят содир этди — Қрим кўпригига ҳужум қилди. Киевдагилар ўтиш жойининг автомобиль йўли фуқаролик объекти эканини билмаслиги мумкин эмас. Аммо бу террорчиларни ҳеч қачон тўхтатмаган. Келажакда ҳам тўхтатмайди. Уларни фақат бундай зарбаларни беришнинг жисмоний имкониятидан маҳрум қилиш, шунингдек, ҳар бир бундай зарба учун жазо муқаррарлиги билан тўхтатиш мумкин», — деган у.
Эслатиб ўтамиз, 2022 йилда ҳам кўприкда портлаш содир бўлганди. Ўтган йилнинг 8 октябрь куни Қрим кўпригининг автомобиллар ҳаракатланадиган бўлагида юк машинаси портлаганди. Оқибатда кўприкнинг бир қисми қулаб тушган ва кўприкда ҳаракат тўхтатилган.
