8 октябрь куни эрталаб Қрим кўпригининг автомобиль қисмида юк машинаси портлаб кетиши натижасида икки қаторли бўлаги қулаб тушди. Портлаш, шунингдек, ўша пайтда Қрим ярим ороли йўналишида ҳаракатланаётган поезднинг еттита ёнилғи бакининг алангаланишига ҳам олиб келди, деб хабар қилмоқда «РИА Новости» Россия миллий аксилтеррор қўмитасига таяниб.
Қайд этилишича, қурбонлар йўқ. Кўприкда ҳаракат тўхтатилди, Керч бўғозида кемалар қатнови давом этмоқда.
Россия президенти Владимир Путин фавқулодда ҳодиса сабабларини аниқлаш ва оқибатларини бартараф этиш бўйича ҳукумат комиссиясини тузишни буюрди. Воқеа жойига Россия Федерацияси Фавқулодда вазиятлар вазирлиги ва Транспорт вазирлиги раҳбарлари жўнаб кетишди.
Қрим кўпригининг узунлиги 19 км. Унинг қурилиши 2014 йилда Россия Қримни аннекция қилганидан кейин бошланган. Кўприкнинг автомобиль қисми 2018 йилнинг май ойида фойдаланишга топширилган. Темир йўл участкаси бўйлаб эса 2019 йил декабрь ойида биринчи поездлар ҳаракатланишни бошлади.
