Бунга қадар футбол бўйича Қирғизистон миллий терма жамоаси бош мураббийи лавозимида ишлаб келган россиялик мутахассис Александр Крестинин Тошкентнинг «Бунёдкор» футбол клубига бош мураббий бўлди, деб хабар берди клуб матбуот хизмати.
««Бунёдкор»дек ўз анъаналарига, қадриятларига эга клубдан бўлган таклифни фахр билан қабул қилдим. Чунки бу каби жамоаларда бош мураббий бўлиб фаолият юритиш ҳар қандай мутахассис учун шараф. Шу боис музокараларимиз узоққа чўзилгани йўқ», — деди у.
Ҳозирда клуб Ўзбекистон Суперлигасида саккизинчи ўринни эгаллаб турибди. «Вазиятни ўрганиб чиқдим, ҳолат кўнгилдагидек эмас. Вазиятни яхши томонга ўзгартириш керак, бу, албатта, биздан меҳнатни талаб қилади. Мен ва ёрдамчиларимга бундай ҳолат бегона эмас, кўникмамиз бор», — деди Александр Крестинин.
44 ёшли мураббий Қирғизистон терма жамоасини тўққиз йил — 2014 йилдан бери бошқарган.
