Тошкентда 20−21 май кунлари бўлиб ўтиши керак бўлган «Жара» халқаро мусиқа фестивали қолдирилди, дея хабар қилди iTicket чипталар сотиш хизмати.
Фестиваль қайси вақтга ёки санага қолдирилгани айтилмаган.
«Афсуски, дунёдаги ҳозирги вазият кенг кўламли мусиқий тадбирларни ўтказиш учун қулай эмас», — дейилади хабарда.
Харид қилинган чипталарни Телеграм iTicket хизматига қайтариш мумкин.
Эслатиб ўтамиз, аввалроқ «Газета.uz» ташкилотчиларга таяниб, фестиваль бошқа муддатга қолдирилиши кутилаётгани ҳақида хабар берган эди.
Эслатиб ўтамиз, 29 март куни блогер Мирзаёр Эркинов «Кремль томонидан қўллаб-қувватланган ва Кремлни қўллаб-қувватловчи Z-артистлар» иштироки туфайли тадбирни бойкот қилишга чақирган эди.
3 апрелга келиб iTicket хизматидаги фестиваль саҳифаси йўқолган, тадбирнинг Instagram аккаунти блокланган эди. Концерт ташкилотчиларининг «Газета.uz»га маълум қилишича, саҳифа Instagram`нинг ўзи томонидан «кўплаб шикоятлар туфайли» блокланган.
Аввалроқ Боку ва Олмаота шаҳарларида ҳам «Жара» фестивали бекор қилинган эди. Қозоғистонда ҳам ижтимоий тармоқ фойдаланувчилари фестивални бекор қилишни талаб қилиб, бойкот эълон қилишди.
Олмаотада бекор қилингандан сўнг фестиваль Тошкентга кўчирилди. Унда HammAli & Navai, EMIN, Ани Лорак, Ольга Бузова, Dabro, Дискотека Авария, Жасмин, Artik&Asti, KARNA.VAL, Ваня Дмитриенко, Vlade Kay, Mary Gu, Bahh Tee & Turken, Cosmos girls, Нюша ва бошқаларнинг иштироки кутилаётган эди.
