Ўзбекистон Соғлиқни сақлаш вазирлиги Intermed Innovation хусусий клиникаси лицензиясини суд орқали бекор қилишга эришганини маълум қилганди. Вазирлик маълумотларига кўра, муассаса Чирчиқ шаҳридаги 3-оилавий поликлиника биносида лицензиясиз тиббий фаолият билан шуғулланган, шунингдек, бошқарма кўрсатмаларига амал қилмаган.
Шундан сўнг, Intermed Innovation компанияси тиббий фаолиятни юритиш бўйича лицензиясининг бекор қилиниши юзасидан изоҳ бериб, Соғлиқни сақлаш вазирлигининг айбловларини асоссиз, лицензияни бекор қилиш бўйича суд жараёнини эса ноқонуний деб атаганди. Тиббиёт муассасаси ССВ раҳбари ўринбосарининг «нохолис хатти-ҳаракати»ни манфаатлар тўқнашуви билан изоҳлаш мумкинлигини тахмин қилаётганини баён этганди.
Соғлиқни сақлаш вазирлиги Intermed Innovation компаниясининг 2023 йил 12 июнь куни «Газета.uz»да эълон қилинган баёнотига нисбатан муносабат билдирди. Вазирлик «материалда келтириб ўтилган барча важларга Тошкент шаҳар иқтисодий ишлар бўйича судлов ҳайъати апелляция инстанциясининг суд мажлисида ҳуқуқий баҳо берилгани ҳамда суд қарорида бу ҳақда аниқ тўхтам ҳамда ечимлар акс эттирилганини маълум қилишини» баён этган.
«Соғлиқни сақлаш вазирлиги аутсорсинг ёки давлат-хусусий шериклик асосида тадбиркорлик субъектларидан тиббий хизматларни сотиб олиш ёхуд тиббий хизмат кўрсатиш учун шартномавий муносабатларга киришишда бу бўйича лицензияга эга бўлиш ёйинки лицензия олиш талабини шартноманинг алоҳида шарти сифатида кўрсатади», — дейилади ССВ баёнотида.
Таъкидланишича, Intermed Innovation МЧЖ ва вазирлик ўртасида 2020 йил 10 февралда тузилган №1−33К-сонли «Тошкент шаҳрида марказлаштирилган клиник-диагностик лаборатория ташкил этиш, жиҳозлар билан таъминлаш ва фаолиятини юритиш ҳақида»ги концессия шартномасининг (118−120-варақлари) 12-иловасида келтирилган «Уч томонлама операторлик келишувининг асосий шартлари» ҳужжатининг 3-бандида «Операцион компания учун қўйилган асосий талаблардан бири барча зарур бўлган лицензияларни олиш» экани белгилаб қўйилган.
«Демак, Intermed Innovation МЧЖ тиббий фаолият манзиллари ва уларда жорий қилинган тиббий ихтисосликлар бўйича лицензия олмасдан ёки лицензиясига ўзгартириш киритмасдан Концессия шартномаси ёхуд давлат-хусусий шериклик асосида тиббий фаолиятни амалга ошириши мумкин эмас», — дейилади вазирлик ахборотида.
Қайд этилишича, МЧЖ Соғлиқни сақлаш вазирлигига хабарнома, эътироз, шикоят шаклларида бир неча марта мурожаат қилиб, янги фаолият манзиллари учун лицензия талаб-шартлари бўйича экспертлик ўрганиш жараёнларидан ўтмаслигини, фаолият манзилларида лицензияланадиган фаолият учун шароит яратилгани ҳақидаги маълумотларни тақдим этмаслигини билдирган. МЧЖга муқаддам берилган лицензияга у томонидан очилган филиаллар манзиллари ва ихтисосликларни киритиб, лицензияни қайта расмийлаштиришни сўраган.
Вазирликка кўра, аввал асосий фаолият манзили учун берилган лицензияга ўзгартириш киритиш ёки қайта расмийлаштириш учун Адлия вазирлигининг «Лицензия» ахборот тизими орқали ариза бериш талаб қилинади.
«Intermed Innovation МЧЖнинг мурожаатида кўтарилган масала — филиалларда хизматларни тиббий фаолият учун тегишли лицензия олмасдан ёки мавжуд лицензияга ўзгартириш киритмасдан амалга ошириш ҳақидаги сўровига рад жавоби берилган. Чунки тиббий фаолият учун лицензия олиш жараёни фаолиятни амалга ошириш жойига нисбатан қатъий лицензия талаб ва шартларини ўз ичига олади», — дейилади ССВ муносабатида.
Вазирлик ахборот хизматининг эслатишича, Вазирлар Маҳкамасининг 2022 йил 21 февралдаги 80-сонли қарори билан тасдиқланган «Махсус электрон тизим орқали айрим фаолият турларини лицензиялаш тартиби тўғрисида ягона Низом»нинг 38-бандига кўра, лицензиялар лицензиатнинг аризасига асосан, масъул орган томонидан қуйидаги ҳолларда ўзгартирилиши мумкин:
- лицензия асосида амалга ошираётган фаолиятини лицензияланадиган фаолият турининг бошқа кичик тури билан кенгайтиришда;
- лицензия асосида фаолият юритаётган юридик шахслар томонидан ташкил этилган филиаллар ва ваколатхоналарнинг ушбу фаолият билан шуғулланишида;
- юридик шахс ҳисобланган тадбиркорлик субъектининг фаолиятни амалга ошириш жойи ўзгарганда.
Қайд этилишича, ушбу банднинг учинчи ва тўртинчи хатбошларида назарда тутилган асослар лицензиат фаолиятини амалга ошириш жойига нисбатан лицензия талаблари ва шартлари паспортларнинг 9-бандида белгиланган тақдирда лицензияни ўзгартириш тартибида ариза тақдим этилади.
Вазирлик ахборотида таъкидланишича, тиббий фаолият паспортининг 9-бандида тиббий фаолиятини амалга ошириш жойига нисбатан лицензия талаблари ва шартлари белгиланган. Лицензия олиш ёки лицензияга ўзгартириш жараёнида Соғлиқни сақлаш вазирлиги мутахассислари томонидан тиббий фаолият жойи (бино ва хоналари), моддий-техник базаси, тиббий техника ва тиббий жиҳозлари, тиббий ходимлари ўрганилади, экспертиза ўтказилади ҳамда бошқа келишиладиган органлар томонидан тегишли келишувни ёки хулосани тақдим этиш учун объектларнинг жойига чиқиб ўрганиш ўтказилади.
Низомнинг 18-бандига кўра, келишиладиган органлар томонидан тегишли келишувни ёки хулосани тақдим этиш учун объектларни жойига чиқиб ўрганиши учун лицензия талабгори лицензияловчи ва келишиладиган органларга тегишли шароитларни яратиб бериши керак.
«Шу сабабли, Intermed Innovation МЧЖнинг мулкчилик асосида ёки бошқа мулкий ҳуқуқлар бўйича тегишли бўлган, санитария қоидалари, меъёрлари ва гигиеник нормативларга мос бўлган лицензияланган фаолият турини амалга оширишга мўлжалланган хоналар мавжудлиги ҳақидаги лицензия талаб ва шартларига нисбатан эътироз билдириб, ушбу шарт Концессия шартномаси билан қамраб олиниши сабабли унга қўлланилмаслиги лозимлигини билдирган важлари ҳуқуқий асосга эга эмас», — дейилади ахборотда.
«Бундан ташқари, Соғлиқни сақлаш вазирлиги МЧЖни огоҳлантирмасдан ва қарор қабул қилмасдан, операторнинг 2026 йил 18 февралга қадар амал қилувчи № 043023-сонли лицензиясини тўлиқ маҳрум қилиш бўйича судга даъво киритгани ҳақида важ келтирилган. Жавобгарнинг ушбу эътирози ҳам ҳеч қандай асосга эга эмас ва ҳақиқатдан мутлақо йироқ», — дея қайд этилган ССВ муносабатида.
Маълум бўлишича, Соғлиқни сақлаш вазирлиги томонидан давлатга тегишли бўлган оилавий ҳамда кўп тармоқли поликлиникаларда аҳолига тиббий хизмат кўрсатиши учун амалдаги лицензиясига ўзгартириш киритиш лозимлиги юзасидан Intermed Innovation МЧЖ ва Тошкент шаҳар соғлиқни сақлаш бош бошқармасига 2022 йил 24 мартда 33−0309/8060-сонли, 2002 йил 12 апрелда 33−09563-сонли, 2022 йил 26 апрелда 33−11230-сонли ва 2022 йил 23 августда 33−25109-сонли огоҳлантириш хатлари юборилган.
Вазирлик баёнотида қайд этилишича, судга ариза киритилгунга қадар Соғлиқни сақлаш вазирлиги ваколатли орган сифатида Intermed Innovation МЧЖ томонидан Тошкент вилояти, Чирчиқ шаҳар, «Шарқ» МФЙ ҳудудида жойлашган 3-сонли оилавий поликлиника биносида лицензиясиз тиббий фаолият олиб борилганли учун МЧЖга молиявий жарима белгилаган ва бажарилиши мажбурий бўлган кўрсатмалардан иборат қарор қабул қилган.
Мазкур ҳужжат ижро этиш учун Intermed Innovation МЧЖга юборилган. Ўз навбатида МЧЖ бу қарор талабларини бажармаслигини маълум қилган ҳамда Тошкент туманлараро маъмурий судига вазирликнинг 33−05606-сонли ва 11−05808-сонли қарорларини бекор қилиш ва қонунга хилоф деб топиш тўғрисида ариза киритган. Тошкент туманлараро судининг 2023 йил 20 апрелдаги ажрими билан аризачи Intermed Innovation МЧЖнинг аризаси бўйича қўзғатилган иш юритишдан тугатилган ва аризачининг талаблари қаноатлантирилмаган.
«Буларнинг барчаси Intermed Innovation МЧЖ қабул қилинган қарорлар ҳақида нафақат тўлиқ хабардор, балки мавжуд камчиликларни судга қадар бартараф қилиш учун етарлича вақтга эга бўлгани ҳамда огоҳлантирилганини сўзсиз исботлайди», — дейилади ССВ ахборотида.
Вазирликка кўра, Intermed Innovation ўз баёнотида «қўлланган жарима лаборатория стандартлари ёки таҳлил олиш тиббий протоколлар бузилгани учун эмас, Тошкент вилояти Чирчиқ шаҳридаги 3-оилавий поликлиниканинг манзили лицензияга илова қилинмагани учун белгиланган»ини қайд этган. Аслида эса бу поликлиника манзили 2021 йилдан бошлаб давлат-хусусий шериклик лойиҳаси доирасида Соғлиқни сақлаш вазирининг 2021 йил 24 сентябрдаги буйруғи, Концессия шартномаси ва операторлик битими билан лойиҳага бириктирилган ҳамда унда ишлашга рухсат берилган.
ССВ Intermed Innovation МЖЧнинг «Соғлиқни сақлаш вазири ўринбосари Улуғбек Собиров ДХШ лойиҳаси бўйича рухсатномалар мавжудлигидан бехабар бўлиши мумкин эмас, чунки поликлиникаларда тиббий асбоб-ускуналар билан жиҳозлаш бўйича ишлар 2021 йилда, тўғридан тўғри лаборатория фаолияти эса 2022 йилнинг февралида бошланган бўлса-да, давлат поликлиникаларида фаолиятни олиб боришга ҳеч қандай эътироз ёки тақиқловчи ҳужжат операторга келмаган» деган важларини ҳам асосга эга эмас, деб топган.
Таъкидланишича, президентнинг 2019 йил 16 апрелдаги ПҚ-4290-сонли «Соғлиқни сақлаш соҳасида давлат-хусусий шерикликни ривожлантириш чора-тадбирлари тўғрисида»ги қарори билан тасдиқланган «Соғлиқни сақлаш соҳасида давлат-хусусий шериклик тўғрисида»ги Низомнинг 5-бандида «Давлат-хусусий шериклик шартларидаги тиббий фаолият хусусий шерик томонидан қонун ҳужжатларида белгиланган тартибда берилган лицензия асосида амалга оширилиши» белгиланган. Шунингдек, ушбу Низомнинг 45-бандига кўра, Давлат-хусусий шериклик тўғрисидаги битим асосий шарт сифатида тиббий фаолиятни лицензиялаш тартибини ўз ичига олиши лозим.
«Концессия шартномасининг ижросини таъминлаш ва тиббий фаолиятни ташкил этиш мақсадида Соғлиқни сақлаш вазирининг 2022 йил 7 январдаги 2-сонли буйруғи билан Intermed Innovation МЧЖга Тошкент шаҳри ҳамда Тошкент вилоятида жойлашган поликлиникалар бириктириб берилган. Бироқ бу лицензиясиз тиббий фаолият билан шуғулланиш ҳуқуқини бермайди. Аксинча лицензия олиш учун тиббий фаолият жойига нисбатан шартномаларни расмийлаштириш, ажратилган хоналарни тиббий жиҳозлар билан таъминлаш каби амалдаги норматив-ҳуқуқий ҳужжатларда белгиланган қонуний талабларни бажаришга йўл очади», — дея қайд этган вазирлик.
Таъкидланишича, Intermed Innovation МЧЖга юқоридаги буйруқ билан Чирчиқ шаҳридаги 3-сонли оилавий поликлиника бириктирилган бўлса-да, жамият ушбу тиббиёт муассасаси жойлашган манзилда лицензия расмийлаштирмасдан тиббий фаолиятни бошлаб юборган. Мазкур ҳолат беморлардан бирининг эътирозига сабаб бўлган.
Шундан сўнг, Тошкент туманлараро иқтисодий судининг 2023 йил 4 майдаги ҳал қилув қарори билан Intermed Innovation МЧЖга 2021 йил 18 февраль куни вазирлик томонидан берилган 043023-сонли лицензия бекор қилинган ҳамда 90 миллион сўм миқдорида молиявий жарима қўлланилган.
«Қолаверса, бу қарордан норози бўлган жавобгарнинг Тошкент шаҳар иқтисодий ишлар бўйича судлов ҳайъатига киритган апелляция шикояти рад этилиб, аввалги суд ҳал қилув қарори ўзгаришсиз қолдирилган ҳамда 2023 йил 31 май кунидан қонуний кучга кирган», — дейилади ССВ баёнотида.
Айтилишича, ҳукуматнинг 2022 йил 21 февралдаги 80-сон қарори билан тасдиқланган «Махсус электрон тизим орқали айрим фаолият турларини лицензиялаш тартиби тўғрисида»ги ягона Низомнинг 51-бандига асосан, вазирликнинг тиббий фаолиятга берилган лицензияни бекор қилиш юзасидан судга даъво аризаси киритилгани тўғрисидаги маълумот «Лицензия» ахборот тизими орқали лицензиатга етказилган.
«Ўз ўрнида Соғлиқни сақлаш вазирлиги Тошкент туманлараро суди ва Тошкент шаҳар суди томонидан қабул қилинган қарорларни қонуний ва адолатли, деб ҳисоблайди. Шунга кўра, жавобгар Intermed Innovation МЧЖ суд қарорларидан норози бўлган тақдирда юқори турувчи суд инстанцияларига тегишли тартибда мурожаат қилиши мумкинлигини маълум қиламиз», — дейилади вазирлик ахборотида.
ССВнинг эслатишича, Соғлиқни сақлаш вазирлиги ваколатли орган сифатида «Лицензиялаш, рухсат бериш ва хабардор қилиш тартиб-таомиллари тўғрисида»ги Қонуннинг 4-моддасида белгиланган принципларга, хусусан, фуқаролар ҳаёти ва соғлиғини сақлашнинг, жамоат хавфсизлиги ва атроф-муҳитни муҳофаза қилишнинг устуворлигига амал қилган ҳолда лицензия талабларига тўлиқ мувофиқлик таъминланган ҳолатдагина лицензия бериш ҳақида қарор қабул қилади.
«Лицензия олмасдан лицензияланадиган фаолият билан шуғулланиш қонунчилик ҳужжатларида белгиланган молиявий санкциялар қўлланишига, маъмурий ва жиноий жавобгарликка тортилишига сабаб бўлади», — дейилади ССВ баёнотида.
Шунингдек, вазирлик соҳа бўйича инвестиция лойиҳаларини қўллаб-қувватлаши, уларни қонунчилик ҳужжатларида белгиланган талаблар бўйича амалга оширишда кўмак кўрсатиши, фуқаролар ҳаёти ва соғлиғини сақлашни, жамоат хавфсизлиги ва атроф-муҳитни муҳофаза қилишнинг устуворлигини таъминлаган ҳолда жисмоний ёки юридик шахслар томонидан тиббий фаолият бўйича лицензиясиз хизмат кўрсатишга рухсат этилмаслиги, лицензия олиш жараёнида консультатив ёрдам кўрасатишга тайёр эканини маълум қилди.
