Тошкент шаҳри туманлараро иқтисодий суди Intermed Innovation хусусий тиббиёт маркази лицензиясини бекор қилиш тўғрисида қарор чиқарди, деб хабар қилди Соғлиқни сақлаш вазирлиги матбуот хизмати.
ССВнинг қайд этилишича, хусусий клиника Тошкент вилоятининг Чирчиқ шаҳрида жойлашган 3-сонли оилавий поликлиника биносида лицензиясиз тиббий фаолият билан шуғулланган.
Шундан сўнг мазкур МЧЖга молиявий жарима белгиланиб, вазирликнинг бажарилиши мажбурий бўлган кўрсатмалардан иборат қарори қабул қилинган. «Аммо Intermed Innovation бу талабларни бажармай, бошқа қатор манзилларда ҳам ўз ноқонуний фаолиятини лицензия олмасдан давом эттириб келган», — дейилади хабарда.
Оқибатда вазирлик Тошкент туманлараро иқтисодий судига МЧЖга тиббий фаолиятни амалга ошириш учун 2021 йил 18 февраль куни берилган лицензияни бекор қилиш ва 90 миллион сўм жарима ундиришни сўраб ариза киритган.
4 май куни суд бу талабларни қаноатлантириш ҳақида ҳал қилув қарори қабул қилган. Бу қарордан норози бўлган жавобгар — Intermed Innovation Тошкент шаҳри умумюрисдикция суди (иқтисодий ишлар бўйича судлов ҳайъати)га апелляция шикояти киритган.
Бироқ ариза қаноатлантирилмаган, биринчи инстанция судининг ҳал қилув қарори ўзгаришсиз қолдирилган ва 31 май куни қонуний кучга кирган.
«Шундан келиб чиқиб, Intermed Innovation МЧЖга тиббий фаолиятни амалга ошириш учун берилган лицензия расман бекор қилинди. Бу ҳақда Адлия вазирлигининг „Лицензия“ ахборот тизими орқали реестрга тегишли ёзув киритилган», — дейди вазирлик бошқарма бошлиғи Жалолиддин Асамутдинов.
Очиқ маълумотларга кўра, Intermed Innovation 2010 йил июнь ойида Тошкентда ташкил этилган. Асосий фаолият тури — бошқа техникалар ва тиббий асбоб-ускуналар улгуржи савдоси. Компаниянинг 99,3 фоизи (қолган 0,7 фоизи Олег Живетинга тегишли) Edinburgh, Office 7, 196 Rose Street манзилида рўйхатдан ўтган Silverdale Trade L. P. шотланд офшорига тегишли. Ушбу манзилда яна 339 та корхона рўйхатдан ўтган.
Intermed Innovation қўшма корхонаси Health Lab Plus, «Жиззах» эркин иқтисодий зонасида рўйхатдан ўтган Bek Oil, Intermed Leasing, Intermed Innovation Trade, Advent Capital Trade шўъба корхоналарига эга. Аффилланган шахслар орасида Олег Живетин, Улуғбек Мулламуҳамедов ва бошқалар бор.
2022 йил бошида Intermed Innovation компанияси Соғлиқни сақлаш вазирлиги билан концессия шартномаси асосида тендерсиз, Марказлаштирилган клиника-диагностика лабораториясини (МКДЛ) яратиш бўйича лойиҳа оператори сифатида танлангани хабар қилинганди. Лабораториялар ташкил этиш учун Тошкент ва Тошкент вилоятидаги 178 та клиникадан бинолар олинган. Intermed`ни устун мавқега эга бўлишда айблаган бошқа тадбиркорларда ҳам саволлар пайдо бўлган лойиҳа ҳақида «Газета.uz» ёзганди. Монополияга қарши қўмита вазиятни ўрганишга киришганини маълум қилган.
