Ўзбекистон фуқароси 23 ёшли Ш. Тожибоев Украинадаги жанговар ҳаракатларда қатнашаётган вақтида ҳалок бўлди, дея хабар қилди Давлат хавфсизлик хизмати.

Йигит оиласини боқиш мақсадида Россияга ишлаш учун кетган. «Ногирон бўлишига қарамасдан, салат цехида ишлади, ёлланма ишчи бўлиб ишлади, қурилишда ишлади», — деди унинг онаси ДХХ эълон қилган видеолавҳада.

Сўнгра йигит Россияда мустақил равишда кафе очиш, ўзига машина олишга муваффақ бўлади.

ДХХ тарқатган видеода йигитнинг онаси Россия-Украина чегарасига одам олиб кетаётганда қўлга тушириб, машинасидан героин чиққанини таъкидлайди.

«Менинг ўғлим тўғрисўз, ҳалол бола, унақа ишлар қилишига ишонмайман», — деди у.

Ш. Тожибоев Россияда қамоқ жазосига ҳукм қилинган. Онасининг сўзларига кўра, унинг ўғли жазо муддатини ўтаётиб, қамоқдан Россия Украинада олиб бораётган уруш учун «сафарбар қилинган».

Аёл ўғли билан охирги марта 10 сентябрь куни суҳбатлашган.

«Фарзандим на қурол ушлашни билади, на армия хизматида бўлган», — дея қайд этди марҳумнинг онаси.

«„Мен ҳеч қандай хизмат қилмайман, одам ўлдирмайман, онажоним, мен бормайман, десам ҳам мажбурлашди“, — деди», — дейди она.

Аёл ўғлининг жасади (фақатгина юқори қисми) Ўзбекистонга олиб келинганини маълум қилди.

«Ҳеч кимга бу кунни раво кўрмайман. Фарзандларингизни эҳтиёт қилинглар, ишлагани кетяпти, деманглар, туҳмат қилишаркан», — дея бошқа ота-оналарга мурожаат қилди у.

2022 йилнинг октябрида Tong Jahoni ва «Русь сидящая» ҳуқуқни ҳимоя қилиш ташкилотлари раҳбарлари Валентина Чупик ва Ольга Романова «Газета.uz»га Россияда меҳнат қилаётган ва ҳибсдаги Ўзбекистон фуқаролари Украинага урушга қандай жалб қилинаётгани ҳақида сўзлаб беришган эди. Ўша вақтдаги маълумотларга кўра, 10 нафар Ўзбекистон фуқароси «сафарбарлик» билан боғлиқ муаммоларга дуч келган.

Жорий йил май ойида эса Буюк Британия Мудофаа вазирлиги Россия ҳукуматининг Украинага қарши жанговар ҳаракатларда қатнашиш учун Марказий Осиёдан келган муҳожирларни ёллашга уринаётганини хабар қилди. Ҳарбий хизматга рози бўлганлар рус қўшинларининг йўқотиш даражаси юқори бўлган фронтга юборилиши мумкин, дейилади шарҳда.

Эслатиб ўтамиз, Ўзбекистон Жиноят кодексининг 154-моддасига кўра, ёлланиш, яъни низолашаётган давлатнинг фуқароси ёки ҳарбий хизматчиси ҳисобланмаган ёхуд назорат қилиниб турган низолашаётган давлат ҳудудида доимий яшамайдиган ёки ҳеч қандай давлат томонидан қуролли кучлар таркибида расмий топшириқни бажариш ваколати берилмаган шахснинг моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланиши 5 йилдан 10 йилгача озодликдан маҳрум қилиш билан жазоланади.

Жиноят кодексининг 154−1-моддасига кўра, Ўзбекистон фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши базавий ҳисоблаш миқдорининг 300 бараваригача миқдорда жарима ёки 3 йилгача ахлоқ тузатиш ишлари билан жазоланади. Ўзбекистон фуқароси юқоридаги хорижий давлатлар органларига хизматга ёлланса, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.