5 май куни UzAuto Motors компанияси Chevrolet Tracker ва Onix автомобиллари учун шартномалар беришни ушбу моделларнинг конфигурацияси янгиланиши муносабати билан вақтинча тўхтатганди. Компания орадан 20 куни ўтиб шартнома бериш бошланишини маълум қилди.
Chevrolet Onix автомобилининг барчага таниш олти комплектацияси ва Chevrolet Tracker`нинг уч комплектацияларига қўшимча янги Premier Plus ва Redline модификациялари учун шартнома тузиш мумкин. Шу билан бирга, шартнома учун очиқ бўлган аввалги комплектацияларнинг нархи ўзгаришсиз қолади.
«Янгиланган комплектациялар ҳам худди бошқа комплектацияларидек UzAuto Motors`нинг Асакада жойлашган автозаводида кузов пайвандлаш, бўяш ва йиғиш каби ишлаб чиқаришнинг тўлиқ цикли асосида ишлаб чиқарилади», — дейилади хабарда.
Ишлаб чиқариш Асака автомобил заводида 620 миллион доллардан ортиқ йўналтирилган сармоя туфайли ишлаб чиқариш линияларини модернизация қилиш натижасида амалга оширилган GM GM (General Motors Global Emerging Markets) платформасида йўлга қўйилади. 2023 йилнинг сентябрида Premier Plus ва Redline комплектацияларини ишлаб чиқаришга старт бериш режалаштирилган.
Қуйида келтирилган моделлар учун контрактация шартномасини тузиш мумкин:
Chevrolet Tracker
- LS
- LS Plus
- LTZ
- LTZ Plus
- Premier
- Premier Plus
- Redline
Chevrolet Onix
- Premier 1
- Premier 2
- Premier 2 Plus
- Redline
Таъкидланишича, Chevrolet Tracker ва Onix автомобилларининг барчага таниш комплектацияларида бўлган жамийки асосий опцияларига қўшимча равишда, Plus комплектацияси барча иситиш тизими опсиялари билан, жумладан рул, олд ва орқа ўриндиқлар (орқа суяниш жойи билан) ён ойналар, олд лабовой ойна иситиш тизими опсиялари билан шунингдек, қорайтирилган орқа ва орқа ён ойналар, двигател ҳимоя картери ва қўшимча қулай опсиялар билан жиҳозланади.
Аввалроқ тармоқларда 1 июндан Damas, Labo, Cobalt ва Lacetti автомобилларининг янгиланган версиялари тақдим этилиши, Cobalt ва Lacetti нархи 20−23 минг долларгача кўтарилиши ҳақида хабарлар тарқалганди. Компания ушбу маълумотлар ёлғон эканини билдирган.
Бунгача Cobalt, Lacetti, Damas, Labo каби бюджет моделларининг сотуви декабрь ойида тўхтатилган ва ҳали тикланмаган.
Асакада Spark ўрнини босувчи янгиланган Tracker кроссоверининг оммавий ишлаб чиқарилиши 2022 йил июлида, Onix седанининг (Nexia муқобили) серияли ишлаб чиқарилиши 2023 йилнинг февраль ойида бошланганди.
