Россиянинг Белгород вилояти губернатори Вячеслав Гладков Украина Қуролли кучларининг диверсия-разведка гуруҳи вилоятнинг Грайворонский тумани ҳудудига кирганини маълум қилди.
«РФ Қуролли кучлари Чегара хизмати, Россия гвардияси ва „ФСБ“ билан биргаликда душманни йўқ қилиш учун зарур чораларни кўрмоқда», — дея қўшимча қилди у. Бундан олдинроқ Вячеслав Гладков Украина Қуролли кучлари эрталабдан бери Граиворонский шаҳар округини ўққа тутаётганини ҳам айтган эди.
Бир неча соат олдин, 22 май куни «Россия Озодлиги» легиони (баъзи маълумотларга кўра, Украина Қуролли Кучларининг россиялик кўнгиллилардан тузилган ҳарбий қисми) ва Россия кўнгиллилар корпуси (шунингдек, Россияга қарши урушда Украина томонидан қатнашаётган руслар ҳам бор) «Белгород вилояти Козинка қишлоғини тўлиқ озод қилганликларини» эълон қилдилар.
Орадан бир ярим соат ўтгач, каналда янги пост пайдо бўлди: «Гора-Подол (Грайворонский туманидаги қишлоқ — таҳр.) ортда қолди! РКК билан легион Белгород вилоятидаги Грайворон аҳоли пунктига ҳужумни бошлади».
Бунгача легион чегара ҳудудлари аҳолисига мурожаатномани эълон қилган эди: «Уйда қолинг, қаршилик кўрсатманг ва қўрқманг: биз сизнинг душманингиз эмасмиз. Путин зомбиларидан фарқли ўлароқ, биз тинч аҳолига тегмаймиз ва улардан ўз мақсадларимиз учун фойдаланмаймиз. Озодлик яқин!»
Душанба куни РФ ҳудудига «ҳамла» қилган Россия кўнгиллилар корпусининг Телеграм-каналида «РКК жангчилари Россияга қайтди», дея хабар қилди.
Белгород вилоятидаги вазият бўйича Украина Бош разведка бошқармаси «Суспільне» нашрига изоҳ берди.
«Россия озодлиги» легиони ва Россия кўнгиллилар корпуси Белгород вилояти ҳудудида Украина тинч аҳолисини ҳимоя қилиш учун «хавфсиз зона» яратиш бўйича операция ўтказмоқда", — дея маълум қилди бошқарма матбуот котиби Андрей Юсов. Унинг сўзларига кўра, операция фақат Россия фуқаролари томонидан амалга оширилмоқда.
РФ президенти матбуот котиби Дмитрий Песковнинг айтишича, Владимир Путинга «Украиналик диверсантларнинг Белгород вилоятига бостириб киришга уриниши» ҳақида хабар берилган.
«Россия ҳудудидан украиналик диверсантларни сиқиб чиқариш ва бу қўпорувчилик гуруҳини йўқ қилиш бўйича ишлар олиб борилмоқда, воқеа жойида етарли куч ва воситалар мавжуд», — дея унинг сўзларидан иқтибос келтиради РИА Новости.
