25 апрелдан ерусти ҳалқа метро йўлининг II босқичи доирасида қуриб битказилган 5 та бекатда йўловчи ташувлари бошланди, дея хабар бермоқда Транспорт вазирлиги матбуот хизмати.

Унда синов тариқасида поездларнинг техник қатнови 24 март куни бошланганди.

«Қўйлиқ» бекатидан «Қурувчилар» бекатигача бўлган 5 та янги станциянинг умумий узунлиги 7,74 километрни ташкил этади. Уларга ҳозирча янги ном берилмаган.

Эндиликда Тошкент метрополитенининг бекатлари сони 48 тага етди. Ерусти метроси қурилишининг иккинчи босқичи тўлиқ якунланиши билан Тошкент метрополитенининг жами узунлиги 70 километрдан зиёд, бекатлар сони 50 та бўлади, дейилади вазирлик хабарида.

«Дўстлик» метро бекатидан «Қўйлиқ» бекатигача бўлган метро линиясининг биринчи босқичи 2020 йил август ойида ишга туширилганди. Ўша йилнинг декабрь ойида Чилонзор линиясининг давоми бўлган Сергели филиали очилган.

Ҳозирда яна иккита станцияни ўз ичига олган, узунлиги қарийб 4 км бўлган «Қурувчилар» — «Қипчоқ» бекатининг (Сергели линиясининг 5-бекати) қурилиши давом этмоқда. Ҳозирча ушбу йўналишда автобуслар ҳаракат қилади.