24 март куни Тошкент метрополитени Ер усти ҳалқа йўлининг II босқичи Қўйлиқ-Сергели йўналишида қуриб битказилган 5 та бекатда синов тариқасида поездларнинг техник қатнови бошланди, дея хабар бермоқда Транспорт вазирлиги матбуот хизмати.
Синов тадбирларида вазирлик, «Тошкент метрополитени» корхонаси раҳбарияти, «Боштранслойиҳа», «Ўзбекистон темир йўллари» компанияси мутасаддилари ҳамда ОАВ вакиллари иштирок этган.
Ҳозирда Ер усти ҳалқа метро йўлининг II босқичи — 8,5 км узунликдаги 5 та бекатни ўз ичига олган «Қўйлиқ — Қурувчилар» қисми қуриб битказилган. Лойиҳанинг 3,8 км узунликдаги 2 та бекатни ўз ичига олувчи Қурувчилар — Қипчоқ қисмида қурилиш ишлари олиб борилмоқда.
Вазирлик хабарига кўра, техник синовлардан сўнг мазкур йўналишда йўловчи ташувларининг бошланиши натижасида бир кунда 40 минга яқин йўловчига хизмат кўрсатилади.
Эслатиб ўтамиз, 2022 йилнинг июнь ойида Шавкат Мирзиёев ерусти метросининг Қўйлиқдан Сергелигача бўлган йўналиши (5 та бекат) қурилишини кўздан кечирганди. Лойиҳа қиймати 127,5 миллион долларни ташкил этиши, булар республика бюджети ва Ўзбекистон тикланиш ва тараққиёт жамғармаси маблағларидан амалга оширилиши айтилганди. Поездлар станцияларда 15 сония туриши ҳисобга олинса, оралиқ 13 дақиқада босиб ўтилиши кутилмоқда, дейилганди хабарда.
Тошкент транспорт бошқармаси бошлиғи Анвар Жўраев телеканалга берган интервюсида ҳалқа линиянинг 12-бекати («Қурувчи») ва Сергели йўналишининг 5-бекати («Қипчоқ») оралиғида электробусларда бепул қатнов йўлга қўйилиши режалаштирилаётганини маълум қилган.
Мазкур йўналиш пойтахтнинг Яшнобод, Миробод, Сергели ва Янгихаёт туманларидаги 62 та маҳалла фуқаролар йиғинининг 244 минг нафар аҳолисини қамраб олиши кераклиги қайд этилган.
