Қўқон педагогика институтининг маънавий-маърифий ишлар бўйича проректори Ойбек Бозоров ҳамда яна уч нафар масъул ходим ишдан бўшатилди. Бу ҳақда Олий таълим, фан ва инновациялар вазирлиги матбуот хизмати 5 апрель куни хабар берди.
Таъкидланишича, улар ётоқхонадаги қизларнинг хонасига яширин камера ўрнатилиш «жараёнида бевосита иштирок этиб, хизмат вазифасини суиистеъмол қилган».
«Вазирлик инсон шахсий ҳаётига ўзбошимчалик билан аралашиш, шахсий маълумотларни очиқлашга уриниш каби хатти-ҳаракатларни қаттиқ қоралайди, ушбу ҳолатни талаба-қизларнинг шаъни ва қадр-қимматини камситиш деб баҳолайди. Ҳеч ким инсон эрки ва шахсий ҳаётига дахл қилишга ҳақи йўқ», — деб ҳисоблайди".
Вазирлик хабарига кўра, яна бир нафар мутахассисга интизомий жазо чораси қўлланилди.
Шу ўринда, воқеа иштирокчиси бўлган қизларнинг тазйиқсиз таълим олишлари кафолатланади, дея қўшимча қилинган маълумотда.
Бундан ташқари, айни вақтда ҳуқуқ-тартибот органлари томонидан текширув ишлари давом эттирилмоқда.
Чоршанба куни президент Администрацияси Коммуникациялар ва ахборот сиёсати бўйича шўъба мудири Саида Мирзиёева олий таълим, фан ва инновациялар вазири Иброҳим Абдураҳмонов билан учрашув ўтказганини маълум қилганди.
«Таълим соҳасидаги масалаларни, жумладан, Қўқон педагогика институтида содир бўлган воқеа ҳамда талаба қизларнинг ҳуқуқларини ҳимоя қилиш, уларга нисбатан зўравонликларнинг олдини олиш чораларини муҳокама қилдик», — деб ёзганди у.
Саида Мирзиёеванинг сўзларига кўра, таълим тизими ҳар қандай зўравонликка қарши курашни бошлашимиз керак бўлган асосий платформалардан биридир.
Аввалроқ хонасига яширин камера ўрнатилганини билиб қолган қизлар ички ишлар органларига шикоят қилгани ҳақида ёзгандик. Буни эшитган проректор уларга ИИБга мурожаат қилгани учун танбеҳ берган, ректор эса «институт мулкига» зарар етказганини танқид қилган.
