Талаба қизлар истиқомат қилаётган Қўқон давлат педагогика институти ётоқхонасидаги хоналардан бирига яширин видеокузатув камераси ўрнатилди. Бу ҳақда талабалар Kun.uz`га маълум қилди.
Қизларнинг айтишича, 1 апрель куни уларни референдум тарғиботи тадбиридан зудлик билан чақириб, ётоқхона (талабалар турар жойи)даги хонани очиб беришни сўрашган. Wi-Fi сигнали йўқолиб қолаётгани сабабли уни кучайтирувчи мослама ўрнатилишини айтишган.
Талабалар хонанинг юқори бурчагига ўрнатилган мосламани очиб кўрган. У учта шуруп билан қотирилган. Тўртинчи шуруп жойига шуруп қотирилмаган, лекин қора нарса бўртиб турганини кўрган. Кейинчалик бу нарса яширин камеранинг митти объективи экани маълум бўлган.
Қизлар ўрнатилган мосламани ечиб олиб, мутахассисларга олиб бориб, кўрсатишган. Улар бу матоҳ яширин камера эканини айтишган. деб ёзади. Камера овоз ва тасвирни флеш-дискка ҳам ёзиб олишини, тармоқ орқали бошқа қурилмага узатишини ҳам айтишган. Яъни хонани бу камера орқали онлайн кузатиб туриш имкони ҳам бўлган, деб ёзмоқда нашр.
Қизлар камерага бириктирилган 128 Gb ҳажмдаги флэш-дискни очиб ўқитиб кўрганида уларнинг уйдан келиб, яланғоч кийим алмаштираётганлари ҳам тасвирга тушганига гувоҳ бўлган.
Талабалар 102 рақами (ИИБ)га қўнғироқ қилиб, арз қилган. Президент порталига ҳам ариза ташлаган. Ариза айланиб келиб, маҳаллий участка нозирига тушган. У ўрганмоқда. Участковой маънавий-маърифий ишлар бўйича проректор Ойбек Бозоровга ҳар бир аниқланган детал бўйича ҳисобот бериб тургани айтиляпти, деб ёзади Kun.uz.
Улар институт ректори Дилноза Хўжаевага ҳам мурожаат қилган.
«Ректор саломимизга алик ҳам олгани йўқ. Бизни эшитиб, „яширин камера эканини қаёқдан билақолдинглар?“ деди. Биз уни очиб мутахассисга кўрсатганимизни айтдик. „Хоналарингга ўрнатиб кетилган институтнинг мулкини очиб кўришга нима ҳақларинг бор? Балки ўзларинг ўрнатгандирсизлар“, деб ўшқирди ректор бизга», — дейди қизлар.
Проректор Ойбек Бозоровга йиғлаб мурожаат қилган қизлар «кийиниб-ечинганимиз ҳам видеога олинибди», дейган. Уларнинг сўзларига кўра, проректор бунга жавобан пинагини ҳам бузмасдан, 102 га телефон қилгани учун талабаларни уришиб берган.
Қизларнинг айтишича, проректор бу ҳолатни шикоят қилган қизларни ушбу хонадан кўчириб, у ерга тарбияси оғир бошқа бир қизни жойлаштириш режа қилингани, лекин уларни кўчиришга улгурмай қолингани билан тушунтиришга ҳаракат қилган.
«Газета.uz» университет матбуот хизматига сўров юборди ва жавоб кутилмоқда.
Олий таълим вазирлиги
Олий таълим, фан ва инновациялар вазирлиги матбуот хизмати вазиятни ўргангач, ҳақиқатан ҳам талабалар хонасида яширин камера ўрнатилганини тасдиқлади. Вазирлик ички текширув ўтказиб, айбдорларга нисбатан тегишли чоралар кўрилишини билдирди.
Олийгоҳ
Маълум қилишларича, ректор буйруғига кўра талабаларнинг психологик муамолари билан ишлаш, ўқиш жараёнидаги стресс ҳолатларининг олдини олиш бўйича махсус хона ташкил этиш мақсадида ҳафтанинг шанба-якшанба кунлари талабалар ўз уйига кетишларини ҳисобга олиб, хонани шанба куни жиҳозлаш бошланган.
Олийгоҳ «ҳолат ҳақида талабалар ўз вақтида огоҳлантирилмагани, оқибатда бу англашилмовчилик юз бергани, ҳолат бўйича суриштирув ишлари олиб борилаётганини» билдирди.
Вилоят ИИБ
Таъкидланишича, ҳолат бошқарма томонидан ўрганиб чиқилди.
Ҳозирда мазкур ҳолат юзасидан Қўқон шаҳри ИИБ томонидан терговга қадар текширув ҳаракатлари олиб борилмоқда, дейилади хабарда.
