Ижтимоий тармоқларда Бухородаги истироҳат боғида жойлашган Twister аттракционида учаётган оила (эр-хотин ва уларнинг фарзанди) қулаб тушгани акс этган видео пайдо бўлди.
Бухоро вилояти ИИБ матбуот хизматининг хабар беришича, воқеа 26 март куни тушдан кейин «Сомонийлар» истироҳат боғида содир бўлган. Жабрланганлар касалхонага ётқизилган. Хабарда айтилишича, уларнинг саломатлиги «яхши».
«Потребител Бухара плюс» Telegram-каналида ёзилишича, боланинг бош суягида ёрилиш, мия чайқалиши, эркакда қўли синиши, мия чайқалиши, аёлнинг ички аъзолари гематомалари, мия чайқалиши, кўкаришлар қайд этилган.
Контехназорат инспекциясининг маълум қилишича, боғдаги аттракционларнинг ҳолати ўтган йилнинг декабрь ойида ўрганилган.
Ўрганиш шуни кўрсатдики, Twister аттракциони статик ва динамик синовлардан ўтмаган ва тадбиркор ундан фойдаланишга рухсатга эга эмас. Бундан ташқари, аттракцион хавфсизлиги учун масъул ходим тайинланмаган. Ўрганишни ўтказган ишчи гуруҳ камчиликларни бартараф этиш бўйича кўрсатма бериб, аттракциондан фойдаланишни тақиқлаган.
Тақиққа қарамай, аттракциондан тегишли кундалик техник назоратсиз фойдаланилган, дейилади хабарда. Инспекция аттракционда текширув ўтказиш ниятида.
Мазкур ҳолат юзасидан Бухоро ИИБ томонидан тергов ҳаракатлари олиб борилмоқда.
