Ўзбекистон президенти Шавкат Мирзиёев Сурхондарё вилоятига ташрифи давомида ўзи автомобиль бошқариб, Бойсун-Денов йўналишидаги йўллар сифатини танқид қилган эди, мазкур йўлларни таъмирлаш ишлари бошланди, деб хабар қилди вилоят ҳокимлиги.
Умуман олганда, Бойсун, Бандихон, Қумқўрғон, Олтинсой ва Денов туманлари ҳудудидан ўтувчи йўлнинг 111 километрини реконструкция қилиш режалаштирилган.
Ишга 70 дан ортиқ махсус техника ва 120 нафар ишчи жалб этилган.
Аввал ёзганимиздек, Шавкат Мирзиёев Бойсун-Денов йўли бўйлаб саёҳати чоғида бу йўлларда «ҳаракат қилиб бўлмайди» деган эди.
У вилоят ҳокими Улуғбек Қосимовга автомобиль йўллари қўмитаси раиси Абдураҳмон Абдувалиев билан биргаликда 15 кун муддатда жамоатчилик фикрини инобатга олган ҳолда «замонавий, сифатли ва текис йўл» лойиҳасини ишлаб чиқишни топширган.
