Наманган вилояти Тўрақўрғон туманидаги каналга ўзини ташлаган эркак ҳалок бўлди. Бу ҳақда Zoʻr TV телеканалининг Bu kun дастурида маълум қилинди.
Қайд этилишича, ҳолат туманнинг «Бекобод» МФЙ ҳудудидан оқиб ўтувчи Шимолий Фарғона канали ҳудудида рўй берган. У ерда яқинлари билан кетаётган 54 ёшли фуқаро ўзини сувга ташлаган.Ҳозирча унинг нега бундай қилгани номаълум.
Эркак кўп сув ютиб юбориши оқибатида ҳалок бўлган. Ҳолат юзасидан суриштирув ишлари олиб борилмоқда.
Вилоят фавқулодда вазиятлар бошқармаси матбуот котибининг билдиришича, қутқарувчилар воқеа жойига етиб бориб, каналда бир кишининг оқиб кетаётганини кўрган. Шундан сўнг фуқаронинг жасади сувдан олиб чиқиб берилган.
«Шу ўринда фуқароларимиздан ёз фасли яқинлашаётгани сабабли тақиқланган жойларда чўмилмасликни, дарё ва канал бўйларида фарзандларини назоратсиз қолдирмасликларини тавсия қиламиз», — дейди бошқарма ходими.
Эслатиб ўтамиз, 2020 йилги ёз мавсуми давомида 142 нафар фуқаро, шундан 51 нафари чўмилиш, 85 нафари эса эҳтиётсизлик оқибатида сувда чўкиб ҳалок бўлганди, чўкканларнинг 45,3 фоизини вояга етмаганлар ташкил этган.
