9 мартга ўтар кечаси Россия яна Украина шаҳарларига йирик ракета ҳужумини уюштирди. Президент Владимир Зеленский 81 та ракета учирилганини, Днепропетровск, Житомир, Кировоград, Харьков, Суми, Винница, Львов, Ивано-Франкивск, Одесса, Запорожье вилоятлари ва Киевга ҳужум қилинганини айтди.
Львов вилоятида ракета хусусий сектордаги турар-жой биноларига келиб тушди, шундан сўнг ёнғин бошланди. Беш киши ҳалок бўлди, дея маълум қилди вилоят раҳбари Максим Козицкий.
Днепропетровск вилоятида, ҳудуд раҳбари Сергей Лисакнинг сўзларига кўра, артиллерия ўқлари натижасида бир киши ҳалок бўлган, яна икки киши яраланган.
Шунингдек, Киев ва Харьков вилоятида ўққа тутилган, инфратузилма объектларига зарар етган — Одесса ва Днепропетровск вилоятлари ҳамда Кривой Рогда ҳам қурбонлар бор.
Владимир Зеленскийнинг таъкидлашича, душман яна украиналикларни қўрқитиш учун тинч аҳолини қўрқитиш бўйича «ўзининг аянчли тактикасига» қайтган. «Улар қила оладиган нарса шу. Аммо бу уларга ёрдам бермайди. Улар қилган барча ишлари учун жавобгарликка тортилмасдан қолмайди», — деди у.
9 март куни тушдан кейин Россия Мудофаа вазирлиги «2 март куни Брянск вилоятида Киев режими томонидан уюштирилган террорчилик ҳаракатларига жавобан РФ Қуролли кучлари катта жавоб зарбаси берди», — деб маълум қилди. «Украина ҳарбий инфратузилмасининг асосий элементлари, ҳарбий-саноат комплекси корхоналари, шунингдек, уларни таъминловчи энергетика объектларига зарба берилди», — дейилади вазирлик хабарида.
Эслатиб ўтамиз, Россия «ФСБ» 2 март куни Украинанинг қўпорувчилик-разведка гуруҳи Брянск вилояти ҳудудига бостириб киргани ҳақида хабар қилди. Бироқ тармоқда Россия кўнгиллилар корпуси видеоси пайдо бўлди, унда корпус вакиллари ўз ватанларини озод қилиш учун келганликларини эълон қилишаётгани этган эди. Украина президенти девони раҳбари маслаҳатчиси Михайло Подоляк вазиятни изоҳлар экан, унинг мамлакати Россия ҳудудига ҳужум қилмаслиги ва у ерга диверсантлар юбормаслигини айтди.
