Россиянинг Брянск вилояти Климовский туманида «давлат чегарасини бузган қуролли украиналик миллатчиларни йўқ қилиш чоралари кўрилмоқда», деб ёзади РИА Новости РФ Федерал хавфсизлик хизматига таяниб. Операция Мудофаа вазирлиги кучлари билан ҳамкорликда ўтказилмоқда.
Вилоят губернатори Александр Богомазга таянган агентлик маълумотларига кўра, бир гуруҳ украиналик диверсантлар Климовский тумани ҳудудига кириб келган, улар автомобилга қарата ўқ узган — бир киши ҳалок бўлган, бир бола яраланган. Бундан ташқари, губернаторнинг сўзларига кўра, Климовский туманидаги Сушаний қишлоғида ҳам турар-жой биноси дрондан тушган снаряддан ёниб кетган.
Россиянинг турли манбалари диверсион-разведка гуруҳи 40−50 кишидан иборат экани, улар 100 га яқин одамни гаровга олгани ҳақида хабар беришди. Бироқ РИА Новости губернатор матбуот котибига таяниб, қуролланган шахслар сони номаълумлиги, гаровга олинганлар ҳақидаги маълумотлар тасдиқланмаганини ёзди.
Ижтимоий тармоқларда содир бўлаётган воқеалар муносабати билан бугун Россия Хавфсизлик кенгашининг фавқулодда йиғилиши ўтказилиши мумкинлиги ҳақида хабарлар тарқалди. Бироқ президент Владимир Путиннинг матбуот котиби Дмитрий Песковнинг 2 март куни учрашув режалаштирилмагани, бироқ эртага кенгашнинг доимий аъзолари билан учрашув режалаштирилганини маълум қилди. У, шунингдек, Брянск вилоятидаги воқеалар ҳақида гапирди — унинг сўзларига кўра, гап террорчилар ҳужуми ҳақида кетмоқда, уларни йўқ қилиш чоралари кўрилмоқда.
Шу билан бирга, Россия ва Украина Telegram-каналларида камуфляж кийган, «Любечанский фельдшерско-акушерский пункт» («Любечанский фельдшер-акушерлик пункти») ёзуви бор бино олдида турган эркаклар Россия кўнгиллилар корпуси вакиллари экани ҳақида баёнот берган видео пайдо бўлди. РФда бу ташкилот террорчи ташкилот сифатида тақиқланган. Унда Украина учун курашаётган руслар бирлашган, деб ҳисобланилади.
«Хўш, дўстлар, мана, уддаладик. Россия кўнгиллилар корпуси РФ чегарасини кесиб ўтди. Далил шундоққина орқамда, — дейди видеодаги эркаклардан бири белгига ишора қилади. — Биз тинч аҳоли билан урушмаймиз, қуролсизларни ўлдирмаймиз, шуни ёдда тутинг. Энди оддий Россия фуқаролари қул эмаслигини тушуниш вақти келди».
Эркак ўз нутқида русларни ғалаён ва жангга чақиради.
Иккинчи видеода яна икки киши қалқон ва қилич тимсоли бўлган кўк байроқни кўтариб баёнот беради.
«Биз, Россия кўнгиллилар корпуси жангчилари, ушбу видеони Брянск вилоятидан ёзиб оляпмиз. Биз бу ерга диверсион-разведка гуруҳи сифатида эмас, балки озодлик армияси сифатида жонажон ватанимизга келдик, — дейди улардан бири. Шу пайтда узоқдан ўқ овозлари эшитилади, „Ўзимизникилар“ деган овоз эшитилади кадр ортидан. — Путиннинг жаллодлар ва зўрловчилар армиясидан фарқли ўлароқ, биз тинч аҳоли билан урушаётганимиз йўқ, биз бу ерга сизни озод қилиш учун келганмиз».
«Ҳозирнинг ўзида барча интернет-ресурсларда болаларни ўлдирган, асирларни гаровга олган, лекин шу билан бирга, тезда кетиб қолган „Украина диверсион-разведка гуруҳлари“ ҳақидаги янгиликларни кўришингиз мумкин. Буларнинг барчаси Кремль пропагандачиларининг ёлғонидир. Россия кўнгиллилар корпуси Брянск вилоятига ўз ватандошларига умид борлигини, озод рус халқи қўлларида қурол билан режимга қарши курашиши мумкинлигини кўрсатиш учун келди», — дейилади ташкилотнинг Telegram-каналида.
Украина Бош разведка бошқармаси вакили Андрей Юсов Hromadske нашрига Брянск вилоятида содир бўлаётган воқеаларга изоҳ берди.
«РФ бугун шундай бир тузилмаки, унинг ичида кўплаб миллатлараро, миллатлараро, динлараро, ижтимоий-сиёсий ва бошқа низолар мавжуд. Бугун Россия кўнгиллилар корпусининг оммавий баёноти бор. Булар қўлида қурол билан Путин режимига қарши курашаётган ва уни қўллаб-қувватлаётганлардир… Балки руслар уйғониб, ниманидир англаб, аниқ чоралар кўришаётгандир», — дейди Андрей Юсов.
