9 февраль куни Санкт-Петербургда Ўзбекистон энергетика вазири Жўрабек Мирзамаҳмудов, Қозоғистон энергетика вазири Болат Акчулаков ҳамда «Газпром» ОАЖ бошқарув раиси Алексей Миллер иштирокида уч томонлама учрашув ўтказилди. Бу ҳақда Ўзбекистон Энергетика вазирлиги матбуот хизмати хабар қилди.
Учрашувда Ўзбекистонга Россия табиий газини Қозоғистон ҳудуди орқали етказиб бериш масаласи, хусусан, уч томонлама ишчи гуруҳ томонидан ўтказилган дастлабки техник кўрик натижалари, етказиб беришнинг мавжуд имкониятлари ҳамда жорий йил январь ойида имзоланган «йўл харитаси»нинг (ўшанда Россия компанияси Қозоғистон ҳукумати билан ҳам «йўл харитаси»ни имзолаган эди) ижроси юзасидан муҳокамалар ўтказилди.
Мазкур учрашув якуни билан уч томонлама ўрганишларнинг кейинги босқичини жадаллаштириш ҳамда натижаси бўйича қисқа муддатларда уч томонлама учрашувни қайта ташкил этишга келишиб олинди, дейилади хабарда.
«Газпром»нинг қисқача хабарида шундай дейилади: «Учрашув иштирокчилари газ соҳасида уч томонлама ҳамкорлик имкониятларини муҳокама қилдилар».
«Йўл харитаси» имзолангандан сўнг Ўзбекистон Энергетика вазирлиги ҳамкорликдан мақсад «Ички бозорга газни зарур ҳажмларда етказиб беришдан иборат бўлиб, мавжуд газ узатиш тизимига эгалик ҳуқуқини тўлиқ сақлаб қолиш (бошқарув ҳуқуқини тўлиқ сақлаб қолиш) эканлигини маълум қилган эди.
